جہلم: سوشل میڈیا کے ذریعے شروع ہونے والی دوستی محبت میں تبدیل ہو گئی، اٹلی سے تعلق رکھنے والی جیسمین نامی لڑکی اسلام قبول کرنے کے بعد پاکستانی نوجوان سے شادی کے لیے جہلم پہنچ گئی۔ غیر ملکی لڑکی کی آمد اور پاکستانی نوجوان سے شادی کے فیصلے نے شہر میں لوگوں کی توجہ حاصل کر لی۔
میڈیا رپورٹس کے مطابق جہلم کے رہائشی نوجوان حیدر اور اٹلی سے تعلق رکھنے والی جیسمین کے درمیان سوشل میڈیا کے ذریعے رابطہ قائم ہوا، جو وقت گزرنے کے ساتھ دوستی اور پھر محبت میں تبدیل ہو گیا۔ دونوں نے ایک ساتھ زندگی گزارنے کا فیصلہ کیا، جس کے بعد جیسمین نے اسلام قبول کیا اور حیدر سے شادی کے لیے پاکستان آنے کا فیصلہ کیا۔
اطلاعات کے مطابق پاکستان پہنچنے کے بعد جیسمین اپنے ہونے والے شریکِ حیات حیدر کے ہمراہ شادی کے قانونی مراحل مکمل کرنے کے سلسلے میں ڈپٹی کمشنر آفس جہلم بھی پہنچیں، جہاں شادی سے متعلق ضروری دستاویزی اور قانونی کارروائی کے مراحل طے کیے جا رہے ہیں۔
ذرائع کے مطابق پاکستانی نوجوان حیدر جہلم کے ایک مقامی پراپرٹی آفس میں بطور آفس بوائے ملازمت کرتا ہے۔ سوشل میڈیا سے شروع ہونے والی دوستی کا شادی کے فیصلے تک پہنچنا اس واقعے کو شہر میں موضوعِ گفتگو بنا رہا ہے۔
