دینہ: ایڈیشنل ڈپٹی کمشنر میونسپل سروسز و منیجنگ ڈائریکٹر ستھرا پنجاب ایجنسی جہلم علیزہ ریحان نے منگلا بائی پاس دینہ کا دورہ کیا اور وہاں صفائی کے لیے استعمال ہونے والی مشینری کی کارکردگی کا معائنہ کیا۔
اس موقع پر مکینیکل سویپر اور واٹر اسپرنکلر فعال پائے گئے، تاہم سڑک کے بائیں جانب صفائی کے انتظامات تسلی بخش نہ ہونے پر انہوں نے تشویش کا اظہار کیا۔
علیزہ ریحان نے صفائی کے ناقص انتظامات کا نوٹس لیتے ہوئے متعلقہ سپروائزر کو وارننگ جاری کی اور تحصیل مینیجر کو ہدایت کی کہ سڑک کے بائیں جانب صفائی کی کمی کو فوری طور پر دور کیا جائے۔
انہوں نے واضح کیا کہ صرف صفائی کی مشینری کا فعال ہونا کافی نہیں بلکہ اس کا مؤثر استعمال اور سڑک کے تمام حصوں کی صفائی بھی یقینی بنانا ضروری ہے۔
ایڈیشنل ڈپٹی کمشنر میونسپل سروسز و ایم ڈی ستھرا پنجاب ایجنسی جہلم علیزہ ریحان نے متعلقہ عملے کو ہدایت کی کہ منگلا بائی پاس کے دونوں اطراف صفائی کا یکساں معیار برقرار رکھا جائے اور آئندہ کسی بھی حصے کو نظر انداز نہ کیا جائے۔
انہوں نے عملے کو اپنی ذمہ داریاں مؤثر انداز میں ادا کرنے اور صفائی کے انتظامات میں واضح بہتری یقینی بنانے کی تاکید بھی کی۔
