دینہ: پولیس نے خاتون کے ساتھ مبینہ طور پر جنسی زیادتی کی کوشش میں ملوث ملزم کو گرفتار کر لیا۔
ترجمان جہلم پولیس کے مطابق جہلم کی تحصیل دینہ میں ایس ایچ او تھانہ منگلا کینٹ اور ان کی ٹیم نے بروقت کارروائی کرتے ہوئے خاتون کے ساتھ مبینہ طور پر جنسی زیادتی کی کوشش میں ملوث ملزم کو گرفتار کر لیا۔ پولیس کا کہنا ہے کہ ملزم کے خلاف قانون کے مطابق مقدمہ درج کر کے مزید قانونی کارروائی عمل میں لائی جا رہی ہے۔
پولیس حکام کے مطابق واقعے کے تمام پہلوؤں سے تفتیش کی جا رہی ہے اور شواہد کی روشنی میں ملزم کو ٹھوس چالان کے ساتھ عدالت میں پیش کیا جائے گا۔
ڈسٹرکٹ پولیس آفیسر جہلم شفیق احمد چوہدری نے کہا کہ خواتین اور بچوں کے خلاف جنسی جرائم کے مقدمات میں زیرو ٹالرنس پالیسی پر سختی سے عمل کیا جا رہا ہے۔ انہوں نے واضح کیا کہ ایسے جرائم میں ملوث عناصر کے ساتھ کسی قسم کی رعایت نہیں برتی جائے گی اور قانون کے مطابق سخت کارروائی کی جائے گی۔
ڈی پی او نے مزید کہا کہ خواتین اور بچوں کے جان، مال، عزت اور تحفظ کو یقینی بنانا جہلم پولیس کی اولین ترجیح ہے، جبکہ ایسے حساس مقدمات کی تفتیش میرٹ اور قانون کے مطابق مکمل کی جائے گی تاکہ متاثرہ فریق کو انصاف فراہم کیا جا سکے۔
