مانچسٹر: لارڈ میئر مانچسٹریاسمین ڈار نے کہا ہے کہ پاکستان سے متعلق کمیونٹی جس طرح برطانیہ میں اپنی تہذیب اور ثقافت کو اجاگر کرنے کیلئے کوشاں ہے ان کی یہ کوششیں قابل تعریف ہیں۔ اس حوالے سے جو سندھ کی دھرتی سے متعلق تہزیب کو پیش کیا گیا ہے اس پر منتظمین مبارکباد کے مستحق ہیں.
وہ مانچسٹر کے مقامی ہال میں سندھی سنگت برطانیہ کے زیر اہتمام سندھ ڈے پروگرام پر بطور مہمان خصوصی خطاب کر رہی تھیں۔
قبل ازیں منتظمین نے لارڈ میئر سمیت تمام معزز شرکاء کی سندھی سنگت پروگرام میں شرکت کا زبردست الفاظ میں خیر مقدم کیا اور ان کے خیرسگالی جذبات کو حوصلہ افزا قرار دیا۔
یہ پروگرام پورے جوش و خروش کے ساتھ منایا گیاجس میں سندھ کی ٹقافت پر رنگا رنگ پروگرام پیش کیا گیا تقریب کا مقصد سندھ کی قدیم تہذیب، موسیقی اور کلچر کو روشناس کرنا تھا۔
قونصل جنرل مانچسٹر طارق وزیر نے اپنی مصروفیات کے باعث تقریب کی مناسبت سے بھیجے گئے اپنے پیغام میں کہا کہ برطانوی معاشرے نے بڑی خوبصورتی سے پاکستان کے باشندوں کو اپنے اندر سمو لیا ہے برطانیہ کے پاکستانی یہاں کی سیاست ثقافت اور ہر شعبے میں نمایاں کردار ادا کر رہے ہیں ۔
سندھی سنگت یوکے ،کے میڈیا کوآرڈینیٹر ذوالفقارعلی مہر نے کہا کہ یہ تنظیم باقاعدہ طور پر ہر سال انتخابات منعقد کراتی ہے اور کلچرل پروگراموں کے ذریعے سندھ کی عظیم دھرتی کے عظیم سپوتوں کے کام اور فن کو برطانیہ پروموٹ کرتی ہے۔
انہوں نے کہا کہ سندھی سنگت کے جن عہدے داروں نے اس سال کے انتخابات میں حصہ لیا اور منتخب ہوئے ان میں صدر عبدالجبار قریشی، نائب صدر شہزادو وادیو، جنرل سیکرٹری شاہد حسین تاجوانی، سیکرٹری سردار ساہو، انفارمیشن سیکرٹری اے ڈی کیریو اور کلچرل سیکرٹری علی حیدر شامل ہیں ۔
تقریب سے خطاب میں نومنتخب صدر ڈاکٹر عبدالجبار قریشی نے کہا کہ سندھ دھرتی کو یہ اعزاز حاصل ہے کہ اسلام اسی صوبے کے راستے سے برصغیر پاک وہند میں داخل ہوا انہوں نے کہا سندھ پاکستان کا وہ صوبہ ہے جس کی تہذیب کی داستان صدیوں پرانی ہے یہ حضرت لعل شہباز قلندر اور شاہ عبداللطیف بھٹائی کی سر زمین ہے۔
انہوں نےکہا کہ برطانیہ اور پاکستان کے درمیان کلچر وفود کا تبادلہ ہونا چاہئے۔ پاکستان سے آئے سندھی لوک سنگر رجب علی فقیر اور بھارت سے جتن اداس نے اپنے فن کا مظاہرہ کیا۔شرکاء سندھی اجرک، ٹوپی اور سندھی روایتی لباس پہنے ہوئےتھے جوبرطانیہ کے مختلف شہروں گلاسگو، شفیلڈ ،بریڈ فورڈ، لیڈز ،برمنگم ،لیسٹر کے علاوہ یورپی شہروں سے شریک ہوئے۔
ثقافتی تقریب میں سابق کونسلر ماجد ڈار، ڈاکٹر عامر برنی، ڈاکٹر وقار احمد، ڈاکٹر نزیر زاہد، احمد واداہو، شاہد حسین، گل ثنائی میمن، عبدالجبار قریشی کے علاوہ سیاسی، سماجی، سول سوسائٹی کے افراد اور خواتین اور بچوں نے شرکت کی ۔تقریب سے شہزاد وادیو گل ثنائی میمن اور دیگر نے بھی خطاب کیا۔
