جہلم: چیئرمین الحیات ویلفیئر ٹرسٹ حاجی محمد ریاض نے ڈسٹرکٹ جیل جہلم میں جدید واٹر فلٹریشن پلانٹ کا افتتاح کر دیا۔ فلٹریشن پلانٹ کی تنصیب سے جیل میں مقیم اسیران کو صاف اور محفوظ پینے کے پانی کی سہولت میسر آئے گی۔
اس موقع پر سپرنٹنڈنٹ ڈسٹرکٹ جیل یاسر خان، انچارج شعبہ واٹر فلٹریشن اصغر مرزا اور پی آر او ڈپٹی کمشنر جہلم محمد اویس بھی موجود تھے۔ حاجی محمد ریاض نے فلٹریشن پلانٹ کا افتتاح کیا اور صاف پانی کی فراہمی کے فلاحی منصوبے کا جائزہ لیا۔
سپرنٹنڈنٹ جیل یاسر خان نے الحیات ویلفیئر ٹرسٹ کی جانب سے فلٹریشن پلانٹ کی تنصیب پر شکریہ ادا کرتے ہوئے اسے قابلِ تحسین اقدام قرار دیا۔ انہوں نے کہا کہ صاف پانی اسیران کی بنیادی ضروریات میں شامل ہے اور اس سہولت سے جیل میں موجود افراد براہِ راست مستفید ہوں گے۔
واضح رہے کہ الحیات ویلفیئر ٹرسٹ پاکستان سمیت دنیا بھر میں واٹر فلٹریشن پلانٹس اور کنوؤں کی تنصیب کے ذریعے صاف پانی کی فراہمی کے فلاحی مشن پر کام کر رہا ہے، جبکہ ٹرسٹ دیگر فلاحی اور امدادی سرگرمیوں میں بھی فعال کردار ادا کر رہا ہے۔
