دینہ: ماہر امراض جلد ڈاکٹر طیبہ مسعود نے کہا ہے کہ سرد موسم جلد کے لیے نقصان دہ ثابت ہو سکتا ہے اور اس دوران جلد کی مناسب دیکھ بھال نہ ہونے سے خارش اور دیگر مسائل پیدا ہو سکتے ہیں۔
انہوں نے شہریوں کو مشورہ دیا کہ نیم گرم پانی سے غسل کریں کیونکہ بہت گرم پانی جلد میں خارش پیدا کر سکتا ہے۔
ڈاکٹر طیبہ مسعود نے مزید کہا کہ موسم سرما میں جلد کی حفاظت کے لیے نہانے کے دوران ہلکے صابن کا استعمال کیا جائے اور غسل کے بعد موئسچرائزنگ کریم لگانا ضروری ہے۔ جلد کو سرد ہوا اور شدید درجہ حرارت سے محفوظ رکھنے کے لیے سوتی زیر جامہ اور مناسب لباس پہننا چاہیے۔ اندرون خانہ ہوا داری کا مناسب انتظام اور مناسب درجہ حرارت و نمی برقرار رکھنا بھی جلد کی صحت کے لیے اہم ہے۔
انہوں نے متوازن غذا، کافی پانی، مناسب نیند اور ورزش کو جلد کی حفاظت میں معاون قرار دیا اور شہریوں کو ہونٹوں کی حفاظت کے لیے ہونٹوں کی بام لگانے کی تلقین کی۔
ڈاکٹر طیبہ مسعود ماہر امراض جلد ہیں اور ہر سوموار اور جمعرات کو صبح 10 بجے سے 1 بجے تک عدیل کلینک نزد مرکزی جامع مسجد و میزان بینک جی ٹی روڈ دینہ میں مریضوں کا معائنہ کرتی ہیں۔
