لندن: یوکے پاکستان ڈینٹل ایسوسی ایشن کے سابق صدر ڈاکٹر عاشق حسین غوری انتقال کرگئے۔
ڈاکٹر عاشق غوری کی نماز جنازہ جامع مسجد ہونسلو میں بعد نماز ظہر ادا کی گئی جس کے بعد برا سمٹری وٹن میں تدفین عمل میں آئی۔ نماز جنازہ میں سیکڑوں افراد نے شرکت کرکے مرحوم کے صاحبزادوں ڈاکٹر سرفراز غوری اور عارف غوری سمیت دیگر سے اظہار تعزیت کیا۔
اس موقع پر ان کا کہنا تھا کہ ڈاکٹر غوری اپنے وطن پاکستان سے بے حد محبت کرتے تھے اور اس کی ترقی و خوشحالی کے لیے ہمیشہ کوشش کرتے نظر آتے، وہ گوادر کو پاکستان کا مستقبل سمجھتے تھے اور اس میں سرمایہ لگانے کی اہمیت کے حوالے سے آگاہ کرتے رہتے تھے۔
ان کا کہنا تھا کہ اپنی ایسوسی ایشن کے پلیٹ فارم سے انہوں نے متعدد نوجوان پاکستانی ڈاکٹرز کی رہنمائی بھی کی۔ وہ پاکستان جاکر میڈیکل کالجز میں لیکچر بھی دیا کرتے تھے ان کے پاکستان کے متعدد سیاستدانوں سے ذاتی مراسم تھے اور وہ ہمیشہ کہا کرتے تھے کہ وہ اس سیاسی جماعت یا رہنما کے ساتھ ہیں جو پاکستان کو آگے لے جاسکتا ہے۔
ڈاکٹر غوری کا خاندان ہر سال اہتمام کے ساتھ ان کی سالگرہ بھی منایا کرتا تھا، نماز جنازہ میں کمیونٹی کے متعدد افراد نے شرکت کی۔
