دینہ کے نواحی علاقہ بڑل منی ڈیم کے کنارے اچانک شگاف پڑ گیا جس سے انتظامیہ کی دوڑیں لگ گئیں۔
سمال ڈیم ڈپارٹمنٹ کی بروقت نشاندہی پر ضلعی انتظامیہ نے فوری ایکشن لیتے ہوئے پولیس، سول ڈیفنس اور ریسکیو 1122 کو متحرک کیا۔ متعلقہ اداروں نے مشترکہ کارروائی کرتے ہوئے شگاف کو پُر کر دیا جبکہ قریبی آبادی کو احتیاطی طور پر محفوظ مقامات پر منتقل کر دیا گیا۔
اطلاع ملتے ہی ڈپٹی کمشنر جہلم میثم عباس، ایڈیشنل ڈپٹی کمشنر ریونیو سنیہ صافی، اسسٹنٹ کمشنر دینہ صفاء عابد، وفاقی وزیر کوآرڈینیٹر راجہ علی، ڈی ایس پی چوہدری شہباز ہنجرا، تحصیلدار دینہ شمشیر حیدر رانجھا سمیت اعلیٰ افسران موقع پر پہنچ گئے اور صورتحال کا جائزہ لیا۔
انتظامیہ نے فوری طور پر منی ڈیم کے قریب واقع دکانیں بند کرا دیں اور اعلانات کے ذریعے مقامی علاقوں سندر ٹاؤن اور پنڈوری کے رہائشیوں کو محفوظ مقامات پر منتقل کر دیا۔ متعلقہ ٹیموں نے ہنگامی بنیادوں پر کارروائی کرتے ہوئے شگاف کو مکمل طور پر پُر کر دیا، جس کے بعد صورتحال قابو میں آ گئی اور کسی بڑے نقصان کا اندیشہ ٹل گیا۔
عوام نے ضلعی انتظامیہ، سمال ڈیم ڈپارٹمنٹ، پولیس، سول ڈیفنس، ریسکیو 1122 اور دیگر اداروں کی بروقت اور بھرپور کوششوں کو سراہا۔
