دینہ: حلقہ این اے 60اور پی پی 24کے لیے امیدواروں کی جانب سے کاغذات نامزدگی جمع کروانے کا سلسلہ جاری ہے، این اے 60سے 2امیدواروں جبکہ پی پی 24سے 6 امیدواروں نے کاغذات نامزدگی جمع کروائے، امیدواروں نے اپنے کارکنوں کے ہمراہ ریٹرننگ آفیسر کے آفس میں پہنچے جہاں کاغذات جمع کروائے، حلقہ این اے 60اور پی پی 24میں سیاسی سرگرمیاں عروج پر پہنچ گئیں ۔
تفصیلات کے مطابق الیکشن کمیشن آف پاکستان کی طرف سے جاری شیڈول کے مطابق حلقہ این اے 60جہلم کیلئے کاغذات نامزدگی جمع کروانے کے لیے مسلم لیگ (ن) کے سابق ایم پی اے چوہدری ندیم خادم اور سابق ایم پی اے تحریک انصاف سبرینہ جاوید اپنے ساتھیوں کے ہمراہ ریٹرننگ آفس جہلم پہنچیں جہاں انہوں نے اپنے کاغذات نامزدگی جمع کروائے۔
حلقہ پی پی 24کیلئے مسلم لیگ (ن) کے سابق ایم پی اے راجہ اویس خالد ، سابق ایم پی اے مسلم لیگ (ن) چوہدری ندیم خادم ، تحریک انصاف کے سابق ایم پی اے راجہ یاور کمال ، خواتین کی مخصوص نشست سے کامیاب ہونے والی سابق ایم پی اے سبرینہ جاوید کیانی ، تحریک لبیک کے سید عرفان امیر بخاری و دیگر شامل ہیں۔
امیدوار اپنے کارکنوں کے ہمراہ ریٹرننگ آفس سوہاوہ پہنچے جہاں موجود ان کے کارکنوں نے بھی استقبال کیا ، پھولوں کے ہار پہنائے جبکہ دیگر امیدوار آج اپنے کاغذات نامزدگی جمع کروائیں گے۔ اسی طرح حلقہ این اے 60اور پی پی 24میں سیاسی سرگرمیاں عروج پر پہنچ گئیں کارکن اپنے اپنے امیدواروں کے ساتھ پر امید نظر آنے لگے ۔
