جہلم: سول لائن، تحصیل روڈ، قبرستان چوک اور محمدی چوک میں بااثر دکانداروں نے دوبارہ تجاوزات قائم کر لیں جبکہ تجاوزات کے قیام میں ملوث میونسپل کمیٹی (ایم سی) کے ملازمین کے خلاف کوئی کارروائی نہ ہو سکی، جس پر شہریوں میں شدید بے چینی اور مختلف قیاس آرائیاں جنم لے رہی ہیں۔
چند ہفتے قبل انتظامیہ نے اندرونِ شہر سمیت سڑکوں، بازاروں اور چوراہوں پر عارضی اور مستقل تجاوزات کے خلاف بڑے پیمانے پر آپریشن کرتے ہوئے کروڑوں روپے مالیت کی سرکاری اراضی واگزار کروا لی تھی۔ اس دوران کئی غیر قانونی دکانوں اور تعمیرات کو مسمار کر دیا گیا تھا، جبکہ باقی ماندہ دکانداروں کو مزید تعمیرات کرنے سے روک دیا گیا تھا۔
شہریوں کا کہنا ہے کہ اب نادیدہ قوتوں کی پشت پناہی سے ایک مرتبہ پھر تجاوزات کا سلسلہ شروع ہو چکا ہے، جس سے ٹریفک کی روانی اور پیدل چلنے والوں کو شدید مشکلات کا سامنا ہے۔
شہریوں نے تجاوزات کے خاتمے کے لیے سخت اور مستقل بنیادوں پر اقدامات اٹھانے کی اپیل کی ہے تاکہ شہر کی سڑکیں اور بازار دوبارہ تجاوزات مافیا کے قبضے میں نہ جائیں۔
جہلم شہر کی سماجی، فلاحی اور رفاعی تنظیموں کے عمائدین نے وزیر اعلیٰ پنجاب، چیف سیکرٹری پنجاب، سیکرٹری بلدیات، کمشنر راولپنڈی، ڈپٹی کمشنر جہلم، ایڈمنسٹریٹر میونسپل کمیٹی اور چیف آفیسر میونسپل کمیٹی سے فوری نوٹس لینے کا مطالبہ کیا ہے۔
