سابق وزیراعظم و صدر پاکستان مسلم لیگ ن نواز شریف نے پی ٹی آئی کی جانب سے احتجاج کی کال کو ملک کو ڈی ریل کرنے کی کوشش قرار دے دیا۔
وزیراعلیٰ پنجاب مریم نواز کے ہمراہ لندن سے وطن روانگی سے قبل میڈیا سے گفتگو کرتے ہوئے انہوں نے کہاکہ جو لوگ ملک میں پروپیگنڈا کررہے ہیں انہیں جھوٹا ہی کہا جائے گا۔
انہوں نے کہاکہ جو لوگ احتجاج کی کال دے رہے ہیں وہ کامیاب نہیں ہوسکیں گے۔
واضح رہے کہ نواز شریف اپنی صاحبزادی مریم نواز کے ہمراہ کچھ روز سے لندن میں مقیم تھے، اور اس دوران وہ کچھ دنوں کے لیے سوئٹزرلینڈ بھی گئے۔
یہ بھی واضح رہے کہ پی ٹی آئی نے 24 نومبر کو اسلام آباد کی جانب مارچ کی کال دے رکھی ہے۔
اس حوالے سے وزیراعلیٰ خیبرپختونخوا علی امین گنڈاپور کا کہنا ہے کہ اب ہم سروں پر کفن باندھ کر نکلیں گے اور جب تک مطالبات تسلیم نہیں کیے جاتے واپس نہیں جائیں گے۔
دوسری جانب عمران خان کی اہلیہ بشریٰ بی بی نے بھی باقاعدہ سیاسی میدان میں قدم رکھ لیا ہے، اور گزشتہ روز پارٹی رہنماؤں کو ہدایات جاری کرتے ہوئے کہا ہے کہ جو شخص احتجاج میں لوگوں کو نہیں لائے گا اسے پارٹی سے نکال دیا جائے گا۔
