جہلم: عید الفطر کے موقع پر بزرگ ، خواتین اور بچے اپنے والدین اور دیگر رشتہ داروں کو یاد کرنے کے لیے قبرستانوں میں پہنچنے لگے، قبرستانوں کے باہر پھولوں کی پتیاں ، رنگ برنگی مالا ، پھولوںسے بنی قبروں پر چڑھانے والی چادریں فروخت کرنے والے دکانداروں نے عارضی ٹھیئے لگا رکھے تھے۔سیکورٹی کے بھی خصوصی انتظامات کئے گئے۔
عید الفطر سے قبل شہریوں کی بڑی تعدا د نے قبرستانوں کا رخ کیا کیونکہ وہ اپنے پیارے بزرگوں، خواتین، بچوں، والدین کی قبروں پر حاضری دیتے ہیں، قبروں کو صاف کیا جاتا ہے پانی سے چھڑکاؤ کرتے ہوئے قبروں کو دھویا جاتا ہے قبر کے ارد گرد گھاس وغیرہ کو ختم کرتے ہیں، اپنے پیاروں کی قبروں پر گلاب کے پھول، پھولوں کی پتیاں ، پھولوں کی بنی مخصوص چادریں چڑھائی جاتی ہیں۔
مرحومین کی روح کے ایصال ثواب کیلئے فاتحہ خوانی دعا کی جاتی ہے، بعض لوگ گھروں سے ہی قرآن پاک کا ثواب لے کر آتے ہیں اور مرحومین کے درجات کی بلندی کیلئے دعائیں کی جاتی ہیں۔
دوسری جانب قبرستانوں کے باہر گلاب کے پھول اور پھولوں کی پتیاں فروخت کرنے والے دکانداروں نے سٹال لگا رکھے ہوتے ہیں، جہاں پر مالا 100 روپے سے 500 روپے، اگر بتی کا ایک پیکٹ 30 روپے سے 250 روپے، عرق گلاب کی بوتلیں 80 روپے سے 200 روپے، گلاب کے پھولوں کی پتیاں 250 روپے سے 350 روپے فی کلو فروخت کی جاتی ہیں۔
اسی طرح قبروں پر باجرہ، دالیں ، چاول بھی رکھے جاتے ہیں اور پرندوں کے پینے کے پانی کیلئے مٹی سے تیار کی گئی پلیٹیں بھی رکھی جاتی ہیں۔
