جہلم: مشیرِ صحت وزیراعلیٰ پنجاب میجر جنرل (ر) ڈاکٹر اظہر محمود کیانی اور ڈپٹی کمشنر جہلم میر رضا اوزگن کی مشترکہ صدارت میں سی ایم پنجاب یوتھ گیمز 2026ء کے حوالے سے اہم اجلاس منعقد ہوا، جس میں ضلعی انتظامیہ، محکمہ تعلیم، محکمہ کھیل کے افسران، نوجوان کھلاڑیوں اور کوچز نے بڑی تعداد میں شرکت کی۔
اجلاس میں ڈسٹرکٹ سپورٹس آفیسر محمد طارق گجر، ڈسٹرکٹ ایجوکیشن آفیسر ڈاکٹر نازیہ شہزادی، ڈسٹرکٹ ایجوکیشن آفیسر لٹریسی میمونہ انجم اور مختلف محکموں کے افسران سمیت ضلع بھر سے نوجوان کھلاڑی اور کوچز شریک ہوئے۔ اجلاس میں یوتھ گیمز کی تیاریوں، کھیلوں کے میدانوں کی دستیابی اور کھلاڑیوں کی رجسٹریشن کے عمل کا تفصیلی جائزہ لیا گیا۔
مشیرِ صحت میجر جنرل (ر) ڈاکٹر اظہر محمود کیانی نے متعلقہ افسران کو ہدایت کی کہ یونین کونسل، تحصیل اور ضلعی سطح پر کھیلوں کے میدان فوری طور پر فعال کیے جائیں تاکہ نوجوان کھلاڑیوں کو اپنی صلاحیتوں کے اظہار کے لیے مناسب مواقع میسر آ سکیں۔ انہوں نے سرکاری و نجی تعلیمی اداروں سمیت مدارس میں کھلاڑیوں کی رجسٹریشن مہم مزید تیز کرنے کی بھی ہدایت کی۔
بتایا گیا کہ سی ایم پنجاب یوتھ گیمز 2026ء میں 19 مختلف کھیلوں کے مقابلے منعقد ہوں گے، جبکہ کھلاڑیوں کے لیے رجسٹریشن کا عمل جاری ہے۔ نوجوان کھلاڑی 25 ستمبر 2026ء تک مفت آن لائن رجسٹریشن کرا سکتے ہیں۔
میجر جنرل (ر) ڈاکٹر اظہر محمود کیانی نے کہا کہ یوتھ گیمز نوجوانوں کو صحت مند، مثبت اور تعمیری سرگرمیوں کی جانب راغب کرنے کا عظیم مشن ہے۔ کھیلوں کے ذریعے نوجوانوں کو اپنی صلاحیتیں اجاگر کرنے اور آگے بڑھنے کے مواقع فراہم کیے جا سکتے ہیں۔
اس موقع پر ڈپٹی کمشنر جہلم میر رضا اوزگن نے کہا کہ یوتھ گیمز میں شریک کھلاڑیوں کو سفری و طبی سہولیات سمیت تمام ممکنہ سہولیات فراہم کرنے کے لیے اقدامات کیے جائیں گے۔ نوجوان کھلاڑیوں اور کوچز نے بھی عزم کا اظہار کیا کہ وہ صوبائی سطح کے مقابلوں میں بہترین کارکردگی کا مظاہرہ کرکے ضلع جہلم کا نام روشن کریں گے۔
اجلاس کے اختتام پر مشیرِ صحت میجر جنرل (ر) ڈاکٹر اظہر محمود کیانی نے وزیراعلیٰ پنجاب سپورٹس اکیڈمی کی جانب سے نوجوان کھلاڑیوں اور کوچز میں شرٹس بھی تقسیم کیں۔
