جہلم: ملک بھر کی طرح ضلع جہلم میں بھی ناقابلِ برداشت مہنگائی اور پٹرولیم مصنوعات کی قیمتوں میں مسلسل اضافے نے عام شہریوں کی مشکلات میں اضافہ کر دیا ہے۔ بنیادی ضروریاتِ زندگی کی اشیاء کی قیمتیں مسلسل بڑھنے کے باعث متوسط اور غریب طبقہ شدید مالی دباؤ اور ذہنی پریشانی کا شکار ہے۔
شہریوں کے مطابق پٹرول اور ڈیزل کی قیمتوں میں اضافے کے اثرات براہِ راست ٹرانسپورٹ کے کرایوں اور روزمرہ استعمال کی اشیائے ضروریہ کی قیمتوں پر پڑ رہے ہیں۔ حکومت کی جانب سے پٹرولیم مصنوعات پر عائد پٹرولیم لیوی اور حالیہ دنوں میں قیمتوں میں ہونے والے اضافوں نے عوامی مشکلات میں مزید اضافہ کر دیا ہے۔
شہریوں کا کہنا ہے کہ پٹرولیم مصنوعات کی قیمتوں میں یکے بعد دیگرے اضافوں کے باعث ٹرانسپورٹ کے اخراجات بڑھ گئے ہیں، جبکہ اشیائے خورونوش سمیت دیگر ضروری سامان کی قیمتیں بھی عام آدمی کی قوتِ خرید سے باہر ہوتی جا رہی ہیں۔ ان کے مطابق آمدن محدود ہونے کے باوجود روزمرہ اخراجات میں مسلسل اضافہ ہو رہا ہے، جس سے گھریلو بجٹ شدید متاثر ہو رہا ہے۔
متوسط اور کم آمدنی والے طبقے سے تعلق رکھنے والے شہریوں کا کہنا ہے کہ "اب گاڑی یا موٹر سائیکل چلانا تو دور کی بات، دو وقت کی روٹی پوری کرنا بھی محال ہوتا جا رہا ہے۔ روزمرہ اخراجات اور مالی دباؤ نے زندگی مشکل بنا دی ہے، مگر عوام کی مشکلات میں کمی کے لیے مؤثر اقدامات نظر نہیں آ رہے۔”
شہریوں نے حکومت سے مطالبہ کیا ہے کہ پٹرولیم مصنوعات کی قیمتوں میں اضافے کے اثرات کو کم کرنے، مصنوعی مہنگائی اور ناجائز منافع خوری کی روک تھام اور بنیادی اشیائے ضروریہ کی قیمتیں عوام کی قوتِ خرید کے مطابق رکھنے کے لیے مؤثر اقدامات کیے جائیں تاکہ عام شہری کو ریلیف مل سکے۔
