پنڈدادنخان میں اتائیت اور غیر قانونی طبی سرگرمیوں کے خلاف بھرپور کریک ڈاؤن جاری ہے۔ ڈپٹی ڈسٹرکٹ ہیلتھ آفیسر ڈاکٹر انجم قدیر کی نگرانی میں مختلف علاقوں میں کارروائیاں کرتے ہوئے متعدد غیر قانونی کلینکس سیل کر دیے گئے اور مقدمات مزید قانونی کارروائی کے لیے پنجاب ہیلتھ کیئر کمیشن لاہور کو بھجوا دیے گئے۔
محکمہ صحت کے مطابق جہلم کی تحصیل پنڈدادنخان میں یونین کونسل جلالپور کے گاؤں وگھ میں کارروائی کے دوران فاروق (سابق آرمی میل نرس) کو بغیر کسی رجسٹریشن یا لائسنس کے غیر قانونی طور پر طبی خدمات فراہم کرتے ہوئے پایا گیا۔ ملزم ایک ہی جگہ کریانہ اسٹور اور پھل و سبزی کی دکان چلا رہا تھا جبکہ ساتھ ہی ایلوپیتھک علاج بھی کر رہا تھا۔ موقع سے تمام شواہد اکٹھے کرنے کے بعد دکان کو سیل کر دیا گیا اور کیس آن لائن اپ لوڈ کرکے مزید کارروائی کے لیے پنجاب ہیلتھ کیئر کمیشن لاہور کو ارسال کر دیا گیا۔
اسی سلسلے میں گزشتہ روز یونین کونسل کندوال میں واقع کندوال میڈیکل کمپلیکس کو قواعد و ضوابط کی خلاف ورزی پر سیل کر دیا گیا، جبکہ احسان کلینک کے خلاف بھی کارروائی کرتے ہوئے اسے بند کر دیا گیا۔ محکمہ صحت کے مطابق ریٹائرڈ آرمی پرسن احسان مبینہ طور پر غیر قانونی طبی پریکٹس میں ملوث تھا، جس کے خلاف کیس پنجاب ہیلتھ کیئر کمیشن لاہور بھجوا دیا گیا۔
مزید برآں چک حمید میں مبینہ اتائی میاں نذیر (ریٹائرڈ ٹیچر) کے خلاف بھی کارروائی عمل میں لائی گئی۔ محکمہ صحت کی ٹیم نے غیر قانونی طبی پریکٹس اور ممنوعہ ادویات رکھنے کے الزام میں اس کا کلینک سیل کر دیا، جبکہ ایلوپیتھک ادویات، طبی آلات اور دیگر سامان قبضے میں لے لیا گیا۔ اس مقدمے کو بھی مزید قانونی کارروائی کے لیے پنجاب ہیلتھ کیئر کمیشن لاہور ارسال کر دیا گیا۔
ڈپٹی ڈسٹرکٹ ہیلتھ آفیسر ڈاکٹر انجم قدیر نے کہا کہ عوام کی جانوں سے کھیلنے والے اتائیوں کے خلاف بلاامتیاز کارروائیاں جاری رہیں گی اور غیر قانونی طور پر طبی خدمات فراہم کرنے والوں کے ساتھ قانون کے مطابق سختی سے نمٹا جائے گا۔
انہوں نے شہریوں سے اپیل کی کہ علاج معالجے کے لیے صرف رجسٹرڈ اور مستند ڈاکٹرز اور طبی مراکز سے رجوع کریں، جبکہ کسی بھی مشتبہ کلینک یا غیر قانونی طبی سرگرمی کی اطلاع فوری طور پر محکمہ صحت کو دیں تاکہ بروقت کارروائی عمل میں لائی جا سکے۔
