جہلم: شہر میں عیدالفطر کی آمد کے ساتھ ہی چھوٹی عید کی تیاریاں عروج پر پہنچ گئی ہیں جبکہ شہر کے بازاروں اور مارکیٹوں کی رونقیں دوبالا ہو گئی ہیں۔ شہریوں کی بڑی تعداد عید کی خریداری کے لیے بازاروں کا رخ کر رہی ہے۔
خواتین دیدہ زیب کپڑوں کی تلاش میں مصروف ہیں جبکہ مرد حضرات کرتا، شلوار اور میچنگ واسکٹ کی خریداری کرتے دکھائی دیتے ہیں۔ کوئی من پسند کپڑوں کی تلاش میں ہے تو کوئی میچنگ جوتوں کی فکر میں مصروف ہے۔ عید کی آمد پر بچوں کا جوش و خروش بھی دیدنی ہے جو جوتوں کے ساتھ گھڑیاں، چشمے اور دیگر زیبائشی اشیاء خریدنے میں دلچسپی لے رہے ہیں۔
دوسری جانب شہر کے بازاروں میں عید کی خریداری کے لیے آنے والی خواتین کی حفاظت کے لیے ڈی پی او جہلم کی ہدایت پر خواتین پولیس اہلکاروں پر مشتمل خصوصی اسکواڈ بھی تعینات کیا گیا ہے جو دن بھر بازاروں میں گشت کرتا دکھائی دیتا ہے۔ شہریوں کا کہنا ہے کہ پولیس کی موجودگی سے خواتین خود کو محفوظ محسوس کرتی ہیں۔
شہریوں نے ڈی پی او جہلم سے مطالبہ کیا ہے کہ تحصیل روڈ اور مین بازار کو ون وے کیا جائے تاکہ عید کی خریداری کے لیے آنے والے شہریوں کو ٹریفک کی مشکلات کا سامنا نہ کرنا پڑے اور وہ آسانی سے خریداری کر سکیں۔
