جہلم: چہلم حضرت امام حسینؑ کے موقع پر ضلع بھر میں امن و امان کی فضا برقرار رکھنے، سیکیورٹی اور انتظامی امور کو حتمی شکل دینے کے لیے ضلعی امن کمیٹی کا اہم اجلاس ڈپٹی کمشنر جہلم میر رضا اوزگن اور ڈسٹرکٹ پولیس آفیسر (ڈی پی او) شفیق احمد چوہدری کی مشترکہ صدارت میں منعقد ہوا۔
اجلاس میں ضلعی انتظامیہ، پولیس، ریسکیو اور دیگر متعلقہ محکموں کے افسران کے علاوہ تمام مکاتبِ فکر کے علمائے کرام اور امن کمیٹی کے اراکین نے شرکت کی۔ اجلاس کے دوران چہلم کے جلوسوں اور مجالس کے لیے کیے گئے سیکیورٹی اور انتظامی انتظامات کا تفصیلی جائزہ لیا گیا۔
اجلاس میں فیصلہ کیا گیا کہ چہلم کے تمام جلوسوں اور مجالس کے لیے فول پروف سیکیورٹی پلان پر عمل درآمد یقینی بنایا جائے گا۔ اس سلسلے میں حساس مقامات اور جلوسوں کے روٹس کی سی سی ٹی وی کیمروں کے ذریعے مسلسل نگرانی، داخلی و خارجی راستوں پر سخت چیکنگ اور قانون نافذ کرنے والے اداروں کی مؤثر تعیناتی کو یقینی بنایا جائے گا۔
ڈپٹی کمشنر میر رضا اوزگن نے متعلقہ محکموں کو ہدایت کی کہ جلوسوں کے روٹس پر صفائی ستھرائی، سٹریٹ لائٹس کی بحالی، پینے کے صاف پانی، طبی امداد اور دیگر بنیادی سہولیات کی بروقت فراہمی کو یقینی بنایا جائے تاکہ عزاداروں کو کسی قسم کی دشواری کا سامنا نہ کرنا پڑے۔
اجلاس سے خطاب کرتے ہوئے ڈی پی او شفیق احمد چوہدری نے کہا کہ چہلم کے موقع پر امن و امان کے قیام کے لیے تمام دستیاب وسائل بروئے کار لائے جائیں گے اور کسی بھی شرپسند یا قانون ہاتھ میں لینے والے عناصر کے خلاف بلاامتیاز قانونی کارروائی عمل میں لائی جائے گی۔
اس موقع پر مختلف مکاتبِ فکر کے علمائے کرام نے مذہبی ہم آہنگی، اتحاد، بھائی چارے اور رواداری کے فروغ کے عزم کا اعادہ کرتے ہوئے ضلعی انتظامیہ اور پولیس کے ساتھ مکمل تعاون کی یقین دہانی کرائی۔
اجلاس کے اختتام پر ضلعی انتظامیہ نے واضح کیا کہ مذہبی منافرت پر مبنی مواد کی تشہیر، اشتعال انگیزی یا افواہیں پھیلانے والے عناصر کے خلاف قانون کے مطابق سخت کارروائی کی جائے گی، جبکہ چہلم حضرت امام حسینؓ کے تمام پروگراموں کے پرامن انعقاد کو ہر صورت یقینی بنایا جائے گا۔
