جہلم: ڈپٹی کمشنر جہلم میثم عباس نے کہا ہے کہ پنجاب حکومت صوبے بھر کے سکولوں میں طلبہ کو بنیادی تعلیمی سہولیات کی فراہمی کے لیے دن رات کوشاں ہے۔ جونیئر سکولوں اور خصوصی بچوں کے تعلیمی اداروں میں بہتر تعلیمی ماحول اور تمام ضروری سہولیات فراہم کی جا چکی ہیں تاکہ ہر بچہ یکساں تعلیمی مواقع سے مستفید ہو سکے۔
ان خیالات کا اظہار انہوں نے جونیئر ماڈل سکول بلال ٹاؤن اور سپیشل ایجوکیشن سکول بلال ٹاؤن کے دورہ کے دوران کیا۔ ڈپٹی کمشنر میثم عباس نے جونیئر ماڈل سکول میں مختلف کلاسز کا دورہ کیا، جہاں انہوں نے بچوں کی تعلیمی سرگرمیوں کا جائزہ لیا اور اساتذہ سے تدریسی عمل، طلبہ کی کارکردگی اور درپیش مسائل پر تفصیلی گفتگو کی۔
بعد ازاں انہوں نے سپیشل ایجوکیشن سکول کا بھی معائنہ کیا، جہاں انہوں نے خصوصی بچوں کے ساتھ ملاقات کی اور ان کی تعلیم، امدادی آلات، تدریسی طریقہ کار اور دیگر سہولیات کے حوالے سے تفصیلات معلوم کیں۔
اس موقع پر انہوں نے اسکول پرنسپل کو ہدایت کی کہ خصوصی بچوں کو خصوصی توجہ کی ضرورت ہے، کیونکہ یہی بچے اگر درست انداز میں تعلیم و تربیت حاصل کریں تو یہ نہ صرف خود کفیل ہو سکتے ہیں بلکہ معاشرے کے کارآمد اور مفید شہری بھی بن سکتے ہیں۔
ڈپٹی کمشنر میثم عباس نے کہا کہ تمام اساتذہ کی یہ ذمہ داری ہے کہ وہ خصوصی بچوں کی تعلیم، تربیت اور بحالی پر پوری توجہ دیں اور ان کے لیے ایک ایسا تعلیمی ماحول فراہم کریں جو انہیں آگے بڑھنے اور اپنی صلاحیتوں کو بروئے کار لانے کے مواقع فراہم کرے۔
انہوں نے اس عزم کا اظہار کیا کہ ضلعی انتظامیہ تعلیمی اداروں کی بہتری کے لیے ہر ممکن اقدامات کرتی رہے گی تاکہ کوئی بھی بچہ سہولیات کی کمی کے باعث تعلیم سے محروم نہ رہ جائے۔
