جہلم: حکومت پنجاب کی ہدایات کے مطابق ناجائز تجاوزات اور غیر قانونی تعمیرات کے خلاف آپریشن میں تیزی آ گئی ہے۔
میونسپل کمیٹی کے شعبہ انسداد تجاوزات کی ٹیم نے اندرون شہر کے مختلف علاقوں میں کارروائی کرتے ہوئے متعدد پلازوں، پختہ تجاوزات اور درجنوں عارضی تعمیرات کا خاتمہ کیا۔
ڈپٹی کمشنر سید میثم عباس نے ایڈیشنل ڈپٹی کمشنر اور چیف آفیسر بلدیہ کے ہمراہ ان علاقوں کا دورہ کیا، جہاں انہوں نے آپریشن کا جائزہ لیا اور شاندار چوک سمیت دیگر چوراہوں کی تزئین و آرائش کے کام کا معائنہ کیا۔
چیف آفیسر میونسپل کمیٹی نے بتایا کہ اولڈ جی ٹی روڈ، جادہ چوک، شاندار چوک، تحصیل روڈ اور ڈھوک جمعہ روڈ سمیت دیگر ملحقہ علاقوں میں ناجائز تعمیرات کے خلاف کارروائی کی گئی۔ اس دوران کئی غیر قانونی طور پر تعمیر شدہ پلازے اور نجی تعلیمی ادارے سیل کیے گئے، جبکہ عارضی تجاوزات ختم کرکے سامان ضبط کر لیا گیا۔
ڈپٹی کمشنر سید میثم عباس نے اندرون شہر کے مختلف بازاروں اور چوراہوں کا دورہ کرتے ہوئے کہا کہ یہاں گزشتہ سات دہائیوں سے قائم تجاوزات کو ختم کیا جا رہا ہے تاکہ سرکاری سڑکیں اور راستے واگزار کروائے جا سکیں۔ انہوں نے کہا کہ تجاوزات کے خاتمے کے بعد شہر کی سڑکیں اور بازار کشادہ ہو گئے ہیں جو عوام کے لیے بہتر سہولت کا باعث بنیں گے۔
ڈپٹی کمشنر نے بتایا کہ انسداد تجاوزات عملے کی دو شفٹوں میں ڈیوٹیاں لگائی گئی ہیں جو صبح اور شام کے وقت کارروائی کریں گی۔ انہوں نے دکانداروں کو خبردار کیا کہ تجاوزات قائم کرنے یا تھڑے اور شیڈز بنانے کی اجازت نہیں دی جائے گی۔
انہوں نے دکانداروں سے انتظامیہ کے ساتھ مکمل تعاون کی اپیل کی اور کہا کہ جو بھی تجاوزات قائم کرے گا، اس کا سامان سرکاری تحویل میں لے لیا جائے گا۔
