سوہاوہ کے علاقہ بنگالہ لہڑی کے قریب 27 سالہ نوجوان ڈیم میں نہاتے ہوئے ڈوب کر جاں بحق ہو گیا، ریسکیو ٹیموں نے نوجوان کی لاش ڈیم سے نکال لی۔
تفصیلات کے مطابق جہلم کی تحصیل سوہاوہ کے علاقے بنگالہ (پنگالہ)لہڑی کے قریب ڈیم میں نہاتے ہوئے ایک 27 سالہ نوجوان ڈوب کر جاں بحق ہوگیا۔ واقعے کی اطلاع ملتے ہی ریسکیو 1122 کی ٹیم نے فوری کارروائی کرتے ہوئے واٹر ریسکیو سرچ آپریشن شروع کیا اور مسلسل تلاش کے بعد نوجوان کی لاش برآمد کرلی۔
ریسکیو 1122 کے مطابق کالر کی جانب سے اطلاع موصول ہوئی کہ تحصیل سوہاوہ کے علاقے بنگالہ لہڑی کے قریب ڈیم میں نہاتے ہوئے ایک نوجوان ڈوب گیا ہے۔ اطلاع ملتے ہی ریسکیو 1122 کی جانب سے ایک ایمبولینس اور ایک واٹر ریسکیو وین فوری طور پر جائے وقوعہ کی جانب روانہ کردی گئی۔
ریسکیو ٹیم کے موقع پر پہنچتے ہی ڈوبنے والے نوجوان کی تلاش کے لیے واٹر ریسکیو سرچ آپریشن شروع کردیا گیا۔ سرچ آپریشن میں ریسکیو 1122 کے 6 ریسکیورز نے حصہ لیا، جن میں 2 تیراک اور 2 غوطہ خور بھی شامل تھے۔
ریسکیو اہلکاروں نے ڈوبنے والے نوجوان کی تلاش کے لیے تقریباً 500 میٹر کے علاقے میں سکوبا سرچ آپریشن جاری رکھا۔ مسلسل تلاش اور پیشہ ورانہ کوششوں کے بعد ریسکیو ٹیم نے ڈوبنے والے شخص کی لاش تلاش کرلی۔
ریسکیو حکام کے مطابق جاں بحق ہونے والے نوجوان کی شناخت جاوید علی ولد خان ظہیر کے نام سے ہوئی ہے۔
ریسکیو 1122 کی ٹیم نے لاش کو تحصیل ہیڈکوارٹر ہسپتال (THQ) سوہاوہ منتقل کردیا۔
