لندن: برطانیہ میں پاکستان کے ہائی کمشنر ڈاکٹر محمد فیصل جو پاکستان سوسائٹی برطانیہ کے اعزازی صدر بھی ہیں، نے پاکستان سوسائٹی برطانیہ کے عہدیداران کو پاکستان ہائی کمیشن لندن میں مدعو کیا۔
چیئرمین سر ویلیم بلیک برن، پاکستان سوسائٹی برطانیہ کے اعلیٰ عہدیداروں اور اراکین نے بڑی تعداد میں دعوت میں شرکت کی۔
ڈاکٹر محمد فیصل نے پاکستانیوں اور برطانیوں کے مابین تعلقات کو بڑھانے میں پاکستان سوسائٹی برطانیہ کے کردار کو سراہا۔ انہوں نے پاکستان کے مثبت امیج کو اجاگر کرنے پر سوسائٹی کو داد دی جو پاکستانی ثقافت، فنون، موسیقی اور پکوانوں کے فروغ میں اہم کردار ادا کر رہی ہے۔
ہائی کمشنر نے برطانیہ میں مقیم پاکستانیوں کے مابین روابط کو مزید بڑھانے پر زور دیا تاکہ ہم آہنگی اور رواداری فروغ پائے۔
پاکستان سوسائٹی برطانیہ کے چیئرمین سر ویلیم بلیک برن نے ہائی کمشنر ڈاکٹر محمد فیصل اور پاکستان ہائی کمیشن کا شکریہ ادا کیا کہ وہ باقاعدگی سے پاکستان سوسائٹی برطانیہ کے اراکین کو مدعو کرتے ہیں اور پاکستان و برطانیہ کے درمیان روابط کو مستحکم کر رہے ہیں۔
واضح رہے کہ پاکستان سوسائٹی برطانیہ کی بنیاد لندن میں 1951میں رکھی گئی اور اس کے 500سے زیادہ رکن ہیں جن میں پاکستانی اور برطانوی شہری شامل ہیں۔ اس تنظیم کا مقصد برطانیہ میں پاکستان اور پاکستانی فنون، تاریخ، جغرافیہ، اداروں اور معاشرے کے بارے میں آگاہی پیدا کرنا ہے۔
