جہلم: میونسپل کمیٹی چوک سول لائن روڈ پر قائم غیر قانونی ویگن اسٹینڈ نے ٹریفک کا نظام درہم برہم کر دیا۔ گرلز ہائی اسکول کی طالبات کو صبح اور چھٹی کے اوقات میں آمد و رفت کے دوران شدید مسائل کا سامنا کرنا پڑ رہا ہے لیکن تاحال کوئی پرسانِ حال نہیں۔
جہلم شہر کے مصروف ترین اور مرکزی مقام پر بااثر ٹرانسپورٹرز نے انتظامیہ کی مبینہ سرپرستی میں غیر قانونی ویگن اسٹینڈ قائم کر رکھا ہے۔ اسکول کے اوقات میں یہ صورتحال طالبات کے لیے سب سے زیادہ مشکلات پیدا کرتی ہے جبکہ شہری بھی ٹریفک جام اور بدنظمی سے سخت پریشان ہیں۔
شہر کی اہم ترین سڑک، جس کے اطراف کئی سرکاری دفاتر واقع ہیں، پر ہر وقت بے ہنگم ٹریفک کا راج رہتا ہے۔ ناجائز اسٹینڈز کی وجہ سے ویگنیں، رکشے اور موٹر سائیکلیں سڑکوں پر کھڑی رہتی ہیں جس کے باعث ٹریفک جام روز کا معمول بن گیا ہے۔
شہریوں اور دکانداروں نے شکایت کرتے ہوئے کہا ہے کہ متعدد بار متعلقہ محکموں، ٹریفک پولیس، آر ٹی اے سیکرٹری اور مقامی انتظامیہ کو آگاہ کرنے کے باوجود عملی اقدامات نہیں کیے گئے۔ انہوں نے ڈپٹی کمشنر جہلم سے فوری نوٹس لے کر غیر قانونی ویگن اسٹینڈ ختم کروانے کا مطالبہ کیا ہے۔
