جہلم کے مصروف علاقے سول لائن روڈ پر ستھرا پنجاب منصوبے کے تحت نصب کوڑے کے ڈرم کو نامعلوم افراد نے آگ لگا دی، جس کے باعث علاقے میں شدید دھواں پھیل گیا۔
واقعے کے نتیجے میں فضائی آلودگی میں اضافہ ہوا اور شہریوں کو شدید مشکلات کا سامنا کرنا پڑا جبکہ خاص طور پر دمہ اور سانس کے امراض میں مبتلا مریضوں کے لیے صورتحال نہایت تکلیف دہ ثابت ہوئی۔
ذرائع کے مطابق آگ لگنے کے باعث نہ صرف ماحول آلودہ ہوا بلکہ عوامی سہولت کے لیے فراہم کیے گئے سرکاری اثاثے کو بھی نقصان پہنچا، جو قومی وسائل کے ضیاع کے مترادف ہے۔ شہریوں نے بتایا کہ ستھرا پنجاب منصوبہ شہر کو صاف ستھرا اور صحت مند بنانے کے لیے شروع کیا گیا ہے، ایسے واقعات اس عوامی مفاد کے منصوبے کو سبوتاژ کرنے کے مترادف ہیں۔
واضح رہے کہ وزیر اعلیٰ پنجاب مریم نواز شریف صوبے بھر میں فضا کو صاف رکھنے اور ماحول کو بہتر بنانے کے لیے عملی اور ٹھوس اقدامات کر رہی ہیں، تاہم جہلم میں اس نوعیت کے واقعات حکومتی کوششوں کو نقصان پہنچانے کا باعث بن رہے ہیں۔
علاقہ مکینوں نے ضلعی انتظامیہ اور پولیس سے مطالبہ کیا ہے کہ واقعے میں ملوث عناصر کی فوری نشاندہی کر کے ان کے خلاف سخت قانونی کارروائی عمل میں لائی جائے اور آئندہ ایسے واقعات کی روک تھام کے لیے مؤثر اقدامات کیے جائیں، تاکہ شہر کو صاف ستھرا اور صحت مند ماحول فراہم کیا جا سکے۔
