جہلم پولیس نے ضلع بھر میں سپیشل سرچ آپریشنز اور ناکہ بندی کے دوران دہشت گردوں، جرائم پیشہ عناصر اور سماج دشمن افراد کی سرکوبی کے لیے بڑے پیمانے پر کارروائیاں کیں۔
13 مختلف مقامات پر سرچ آپریشنز کے دوران 464 افراد کو چیک کیا گیا، جبکہ شہریوں کی ویری فکیشن پولیس ایپلیکیشن کے ذریعے کی گئی۔ شہر کے داخلی و خارجی راستوں پر بھی خصوصی ناکہ بندی کے ساتھ گاڑیوں اور افراد کی سخت چیکنگ کی گئی۔
ترجمان کے مطابق سرچ آپریشنز کا مقصد ناجائز اسلحہ و منشیات کی برآمدگی، مجرمانِ اشتہاریوں اور سماج دشمن عناصر کی گرفتاری اور شرپسندوں کو اپنے مذموم عزائم سے باز رکھنا ہے۔
ڈسٹرکٹ پولیس آفیسر جہلم طارق عزیز سندھو نے کہا کہ ضلع بھر میں امن و امان کی فضا قائم رکھنے اور عوام کو پرسکون ماحول فراہم کرنے کے لیے سرچ آپریشنز کا سلسلہ مسلسل جاری رہے گا۔
