جہلم کے شہریوں نے پاکستان مسلم لیگ ن کے مرکزی رہنما اور ممبر قومی اسمبلی وزیر مملکت برائے ریلوے و خزانہ بلال اظہر کیانی سے مطالبہ کیا ہے کہ دریائے جہلم کے کنارے واقع جی ٹی روڈ کے دونوں اطراف اور ریلوے پل پر نصب تمام اسٹریٹ لائٹس کو فوری فعال کروایا جائے تاکہ جی ٹی روڈ سے گزرنے والے مسافروں اور سیر و تفریح کی غرض سے دریائے جہلم کے کنارے آنے والے شہریوں کو درپیش مشکلات میں کمی آ سکے اور شہر کی خوبصورتی میں غیر معمولی اضافہ ہو۔
شہریوں نے بتایا کہ دریائے جہلم پر واقع جی ٹی روڈ کے دونوں پلوں اور ریلوے پل پر اسٹریٹ لائٹس کے پولز تو نصب ہیں، تاہم متعلقہ محکموں کی عدم توجہی کے باعث یہ اسٹریٹ لائٹس عرصہ دراز سے بند پڑی ہیں۔ اس صورتحال کے باعث رات کے اوقات میں پلوں پر گھپ اندھیرا چھا جاتا ہے، جو نہ صرف شہریوں کے لیے باعثِ پریشانی ہے بلکہ حادثات کے خدشات میں بھی اضافہ کر رہا ہے۔
شہریوں نے وزیر مملکت بلال اظہر کیانی سے امید ظاہر کی ہے کہ وہ اس عوامی مسئلے کا فوری نوٹس لیتے ہوئے متعلقہ محکموں کو ہدایات جاری کریں گے تاکہ اسٹریٹ لائٹس بحال ہو کر شہریوں کو محفوظ، روشن اور خوشگوار ماحول فراہم کیا جا سکے۔ شہریوں کا کہنا ہے کہ اس اقدام سے نہ صرف عوامی سہولت میں بہتری آئے گی بلکہ جہلم شہر کی جمالیاتی خوبصورتی اور سیر و تفریح کے لیے آنے والے شہریوں کے لیے سہولت بھی ممکن ہو سکے گی۔
