جہلم شہر اور گردونواح میں آوارہ کتوں کی تعداد میں بے پناہ اضافہ ہوگیا ہے جس کے نتیجے میں سگ گزیدگی کے واقعات میں تیزی سے اضافہ دیکھا جارہا ہے۔
گزشتہ چند روز کے دوران ضلع بھر میں درجنوں افراد کو آوارہ کتوں نے کاٹ لیا ہے جبکہ ہسپتالوں میں اینٹی ریبیز ویکسین لگوانے والوں کی تعداد بھی غیر معمولی طور پر بڑھ گئی ہے۔
جہلم شہر سمیت مختلف علاقوں میں آوارہ کتے گلی محلوں اور سڑکوں پر ٹولیوں کی شکل میں دندناتے پھرتے ہیں اور راہگیروں، موٹرسائیکل اور سائیکل سواروں کو نشانہ بناتے ہیں۔ متعدد موٹر سائیکل سوار ان حملوں کے دوران گر کر زخمی بھی ہوچکے ہیں۔
اسی طرح گلی محلوں میں کھیلنے والے بچے اور سکول جانے والے طلباء بھی اکثر اوقات ان کتوں کا نشانہ بنتے ہیں، جس سے عوام میں خوف و ہراس کی کیفیت پیدا ہوگئی ہے۔
ذرائع کے مطابق سرکاری ہسپتالوں میں کتوں کے کاٹے کی ویکسین لگوانے کے لیے آنے والے مریضوں کی تعداد میں نمایاں اضافہ ہوا ہے، جو اس مسئلے کی سنگینی کو ظاہر کرتا ہے۔
عوامی حلقوں نے ضلعی انتظامیہ اور میونسپل حکام سے فوری ایکشن لینے کا مطالبہ کرتے ہوئے کہا ہے کہ آوارہ کتوں کو تلف کرنے کے لیے موثر اقدامات کیے جائیں تاکہ شہری سگ گزیدگی جیسے خطرناک واقعات سے محفوظ رہ سکیں۔
