سوہاوہ: امیر جماعت اسلامی پاکستان حافظ نعیم الرحمٰن کی اپیل پر ایران پر امریکی جارحیت اور بمباری کے خلاف جماعت اسلامی سوہاوہ کے زیر اہتمام بوہڑ چوک سوہاوہ میں ایک احتجاجی مظاہرہ منعقد کیا گیا۔
احتجاج کا آغاز تلاوتِ کلامِ پاک سے ہوا جس کی سعادت حافظ سیف الاسلام نے حاصل کی جبکہ نعت رسول مقبول ﷺ حافظ نعیم قمر (نائب صدر جماعت اسلامی یوتھ، ضلع جہلم) نے پیش کی۔
افتتاحی کلمات امیر جماعت اسلامی سوہاوہ شہر آصف بٹ نے ادا کیے جنہوں نے موجودہ عالمی صورت حال پر روشنی ڈالتے ہوئے امت مسلمہ کے اتحاد پر زور دیا۔ بعدازاں سابق امیر جماعت اسلامی سوہاوہ شہر ملک مسعود اور مجلس وحدت المسلمین کے رہنما مرید عباس نے بھی خطاب کیا اور ایران پر حملے کی مذمت کرتے ہوئے عالم اسلام کو بیدار ہونے کی اپیل کی۔
مظاہرے کے اختتام پر نائب امیر جماعت اسلامی ضلع جہلم سید ضیاءاللہ شاہ بخاری نے پُرجوش خطاب کیا۔ انہوں نے کہا کہ "ایران پر امریکی جارحیت قابل مذمت اور عالمی امن کے لیے خطرہ ہے، امریکہ دنیا بھر میں فتنہ و فساد کا اصل مرکز بن چکا ہے، جبکہ اسرائیل اس کا ناجائز بچہ ہے جس کی مکمل سرپرستی کی جا رہی ہے۔”
انہوں نے مزید کہا کہ "غزہ ہو یا ایران، ہر جگہ امت مسلمہ کو نشانہ بنایا جا رہا ہے اور اب وقت آ گیا ہے کہ مسلمان ممالک محض بیانات اور مذمتوں سے آگے بڑھ کر ایک عملی اتحاد کی طرف آئیں۔”
انہوں نے جذباتی نعروں سے آگے بڑھنے اور مظلوموں کی حمایت میں موثر حکمت عملی اپنانے پر زور دیا۔ مظاہرے میں جماعت اسلامی کے کارکنان و عہدیداران، صدر انجمن تاجران سوہاوہ شیخ محمد علی، مجلس وحدت المسلمین کے مقامی نمائندے اور شہریوں کی بڑی تعداد شریک ہوئی۔
شرکاء نے امریکہ اور اسرائیل کے خلاف نعرے بازی کرتے ہوئے مطالبہ کیا کہ پاکستانی حکومت بین الاقوامی فورمز پر اس جارحیت کے خلاف آواز بلند کرے اور امت مسلمہ کو ایک پلیٹ فارم پر جمع کرنے کے لیے عملی اقدامات کرے۔
