بریڈفورڈ: جامع مسجد شان السلام بریڈفورڈ میں عظیم الشان معراج النبی ﷺ کی روحانی تقریب منعقد کی گئی جس میں کمیونٹی کے نوجوانوں کی بڑی تعداد نے شرکت کی۔
تقریب سے جامع مسجد شان اسلام کے مہتمم علامہ قاری قمر جمیل عطاری نے خطاب کرتے ہوئے کہا کہ معراج مصطفیٰ ﷺ آپ ﷺ کاایک فقیدالمثال معجزہ ہے۔ اللہ تعالیٰ اپنے پیارے وآخری نبیﷺ کواپنے پاس عرش معلی پربلاکرآپﷺ سے ہم کلام ہوئے۔ واقعہ معراج درحقیقت انسانیت کی معراج ہے خاتم الانبیاء جناب رسول اللہ ﷺ نے ارشادفرمایاکہ نمازمومن کی معراج ہے اوریہ عظیم تحفہ معراج میں ہی حاصل ہوا۔
انہوں نے کہا کہ اللہ تعالیٰ کی بندگی اوررسول اللہ ﷺ کی اطاعت ہی دنیاوآخرت میں کامیابی کی ضمانت ہے۔ روحانی تقریب سے دیگرعلمائے کرام نے بھی خطاب کرتے ہوئے واقعہ معراج پرروشنی ڈالی۔ تقریب رات گئے تک جاری رہی عاشقان رسول ﷺ نے ذکر الٰہی اور نوافل ادا کیے۔
اس موقع پرامت مسلمہ باالخصوص فلسطین کے مسلمانوں اور استحکام پاکستان کیلئے خصوصی دعائیں کیں۔
