جہلم: ڈپٹی کمشنر جہلم میثم عباس نے کہا ہے کہ جہلم شہر کی خوبصورتی اور شہری سہولیات میں اضافے کے لیے جاری ترقیاتی کاموں کو جلد مکمل کیا جائے گا۔
یہ بات ڈپٹی کمشنر جہلم میثم عباس نے سول لائن پر روڈ لائن ورک کا جائزہ لیتے ہوئے کہی۔ سول لائن پر روڈ لائن ورک کا جائزہ لیتے ہوئے ڈپٹی کمشنر نے متعلقہ کمپنی کے ذمہ داران سے پراجیکٹ کی رفتار اور معیار سے متعلق تفصیلی معلومات حاصل کیں۔
انہوں نے کہا کہ سڑکوں کی تعمیر کے بعد ان کی آرائش، شجرکاری اور گرین بیلٹ کی تیاری کا عمل تیزی سے جاری ہے تاکہ شہریوں کو ایک صاف، سرسبز اور خوبصورت جہلم کا تحفہ دیا جا سکے۔
ان کا کہنا تھا کہ سڑکوں کے کنارے لگائی جانے والی لائنوں، پودوں اور دیگر آرائشی اقدامات کی بروقت تکمیل سے شہر کا منظرنامہ بہتر ہوگا اور شہریوں کو سفر کے دوران خوشگوار ماحول میسر آئے گا۔
ڈپٹی کمشنر میثم عباس نے کہا کہ جہلم کو ماڈل شہر بنانے کے لیے تمام وسائل بروئے کار لائے جا رہے ہیں اور عوامی تعاون سے ترقی کا یہ سفر کامیابی سے جاری رہے گا۔
