منگلا/جہلم: مقبوضہ کشمیر میں بھارتی مظالم کا شکار نہتے کشمیریوں سے اظہار یکجہتی کیلئے ملک بھر کی طرح ضلع جہلم میں بھی یوم یکجہتی کشمیر جوش و خروش سے منایا گیا۔
تفصیلات کے مطابق یوم یکجہتی کشمیر کے موقع پر پاکستان اور آزاد کشمیر کو ملانے والے تاریخی منگلا پل پر ایک عظیم الشان مرکزی تقریب منعقد ہوئی، جس میں چیئرمین وزیر اعظم یوتھ پروگرام رانا مشہود احمد خان اور ڈپٹی کمشنر جہلم میر رضا اوزگن نے بطور مہمانِ خصوصی شرکت کی۔ اس پروقار تقریب میں سرکاری افسران، سول سوسائٹی، سماجی شخصیات اور شہریوں کی بڑی تعداد شریک ہوئی۔
تقریب کے دوران شرکاء نے منگلا پل پر انسانی ہاتھوں کی طویل زنجیر بنا کر کشمیری عوام سے بھرپور اظہارِ یکجہتی کیا اور دنیا کو کشمیر کی آزادی کا واضح پیغام دیا۔ اس موقع پر فضا نعرۂ تکبیر، کشمیر بنے گا پاکستان اور کشمیریوں کے حق میں لگنے والے نعروں سے گونجتی رہی۔
تقریب کے دوران منگلا کے مقام پر پاکستان اور آزاد کشمیر کے افسران نے مصافحہ کیا جو دونوں خطوں کے درمیان لازوال رشتے، بھائی چارے اور اتحاد کی ایک خوبصورت علامت بن کر سامنے آیا۔
اس موقع پر خطاب کرتے ہوئے چیئرمین وزیر اعظم یوتھ پروگرام رانا مشہود احمد خان نے کہا کہ کشمیر پاکستان کی شہ رگ ہے اور پاکستانی قوم خصوصاً نوجوان اپنے کشمیری بھائیوں کی جدوجہدِ آزادی میں ان کے شانہ بشانہ کھڑے ہیں۔ انہوں نے عالمی برادری پر زور دیا کہ مقبوضہ کشمیر میں جاری بھارتی مظالم کا فوری نوٹس لیا جائے اور کشمیری عوام کو ان کا حقِ خودارادیت دلانے کے لیے عملی اقدامات کیے جائیں۔
ڈپٹی کمشنر جہلم میر رضا اوزگن نے کشمیری عوام کی قربانیوں کو خراجِ تحسین پیش کرتے ہوئے کہا کہ جب تک کشمیر آزاد نہیں ہوتا پاکستانی قوم کی آواز بلند ہوتی رہے گی۔ انہوں نے کہا کہ انسانی زنجیر میں شریک شہریوں کی بڑی تعداد اس بات کا ثبوت ہے کہ پاکستان کے عوام کشمیری بھائیوں کو کسی صورت تنہا نہیں چھوڑیں گے۔
تقریب کے اختتام پر کشمیری شہداء کے درجات کی بلندی، مقبوضہ کشمیر کی آزادی اور پاکستان کی سلامتی کے لیے خصوصی دعا کی گئی، جبکہ شرکاء نے اس عزم کا اعادہ کیا کہ کشمیری عوام کی اخلاقی، سیاسی اور سفارتی حمایت ہر سطح پر جاری رکھی جائے گی۔
