جہلم: اسلام آباد الیکٹرک سپلائی کمپنی (آئیسکو) نے نئے اے ایم آئی میٹرز کی قیمتوں کا اعلان کر دیا ہے جس کے مطابق یہ جدید میٹرز اب مفت نہیں بلکہ مہنگے ہوں گے۔
آئیسکو کی جانب سے جاری نوٹیفکیشن کے مطابق سنگل فیز بیس میٹر کیبل والے اے ایم آئی میٹر کی قیمت 35 ہزار روپے ہوگی جب کہ سنگل فیز 40 میٹر کنکشن کے لیے قیمت 38 ہزار روپے رکھی گئی ہے۔
اس کے علاوہ تھری فیز 20 میٹر کیبل والے اے ایم آئی میٹر کی قیمت 65 ہزار روپے ہوگی جب کہ 40 میٹر تار والے تھری فیز میٹر کے چارجز 1 لاکھ 10 ہزار روپے ہوں گے۔
آئیسکو کے مطابق اب تک ساڑھے پانچ لاکھ پرانے میٹرز کو اے ایم آئی میٹرز سے تبدیل کیا جاچکا ہے اور ان میٹرز کی تبدیلی مفت کی گئی تھی۔ کمپنی نے بتایا کہ صارفین کو ان نئے ٹیکنالوجی سے لیس میٹرز کا فائدہ حاصل ہے۔
نئے کنیکشن کے لیے اے ایم آئی میٹرز کے چارجز لاگو ہوں گے اور یہ میٹرز راولپنڈی سٹی، کینٹ اور ٹیکسلا ڈویژن میں نصب کیے جائیں گے۔
