جہلم پولیس نے اشتہاری مجرمان کے خلاف جاری کریک ڈاؤن کے دوران دو اہم کارروائیاں کرتے ہوئے سال 2019 سے مختلف مقدمات میں مطلوب دو اشتہاری مجرمان کو گرفتار کر لیا۔ گرفتار ملزمان امانت میں خیانت اور بوگس چیک کے مقدمات میں پولیس کو مطلوب تھے اور طویل عرصے سے قانون کی گرفت سے فرار تھے۔
ترجمان جہلم پولیس کے مطابق ایس ایچ او تھانہ سول لائنز اور ان کی ٹیم نے مؤثر کارروائی کرتے ہوئے سال 2019 سے امانت میں خیانت کے مقدمہ میں مطلوب اشتہاری مجرم کو گرفتار کر لیا۔ پولیس حکام کے مطابق ملزم طویل عرصے سے روپوش تھا اور گرفتاری سے بچنے کے لیے مختلف مقامات پر پناہ لے رہا تھا۔ تاہم جدید سائنٹفک طریقہ کار اور پیشہ ورانہ مہارت کو بروئے کار لاتے ہوئے پولیس نے ملزم کو ٹریس کر کے گرفتار کر لیا۔
دوسری جانب ایس ایچ او تھانہ سٹی اور ان کی ٹیم نے ایک اور کامیاب کارروائی کرتے ہوئے سال 2019 سے بوگس چیک کے مقدمہ میں مطلوب اشتہاری مجرم کو گرفتار کر لیا۔ پولیس کے مطابق ملزم مقدمہ درج ہونے کے بعد سے مسلسل روپوش تھا اور قانون کی گرفت سے بچنے کی کوشش کر رہا تھا۔ تھانہ سٹی پولیس نے جدید تکنیکی ذرائع استعمال کرتے ہوئے ملزم کا سراغ لگایا اور اسے گرفتار کر لیا۔
پولیس حکام کا کہنا ہے کہ گرفتار ملزمان کے خلاف قانونی کارروائی جاری ہے اور انہیں قانون کے مطابق عدالت میں پیش کیا جائے گا تاکہ انصاف کے تقاضے پورے کیے جا سکیں۔
ڈسٹرکٹ پولیس آفیسر جہلم شفیق احمد چوہدری نے اس موقع پر کہا کہ اشتہاری مجرمان کی گرفتاری ضلع پولیس کی اولین ترجیحات میں شامل ہے۔ قانون سے فرار اور جرائم میں ملوث عناصر کے خلاف بھرپور اور بلاامتیاز کارروائیاں جاری رہیں گی۔
انہوں نے مزید کہا کہ شہریوں کے جان و مال کا تحفظ، جرائم کا خاتمہ اور قانون کی عملداری کو یقینی بنانا جہلم پولیس کی بنیادی ذمہ داری ہے۔ پولیس جدید تفتیشی اور سائنٹفک طریقہ کار کے ذریعے جرائم پیشہ عناصر کو قانون کے کٹہرے میں لانے کے لیے بھرپور اقدامات کر رہی ہے اور یہ سلسلہ آئندہ بھی جاری رہے گا۔
