جہلم میں حساس اداروں کی خفیہ معلومات پر پولیس نے نواحی علاقے میں سرچ آپریشن کرتے ہوئے 4 غیر قانونی طور پر مقیم افغان باشندں کو گرفتار کر لیا۔
تفصیلات کے مطابق جہلم پولیس کی جانب سے مختلف علاقوں میں غیر قانونی طور پر مقیم افراد کے خلاف سرچ آپریشن اور چھاپوں کا سلسلہ جاری ہے۔ اسی سلسلے میں چک مغلاں میں کی گئی کارروائی کے دوران ایک ڈیرے پر رہائش پذیر چار افغان باشندوں کو حراست میں لیا گیا، جو غیر قانونی طور پر مقیم تھے۔
ذرائع کے مطابق یہ کارروائی حساس اداروں کی خفیہ معلومات کی بنیاد پر جہلم پولیس نے چک مغلاں کے علاقے میں سرچ آپریشن کرتے ہوئے کی۔
پولیس کا کہنا ہے کہ سرچ آپریشن کے دوران گرفتار کیے گئے چاروں افراد کوئی بھی قانونی شناختی یا رہائشی دستاویزات فراہم نہ کر سکے، جس پر انہیں فوری طور پر تھانے منتقل کر دیا گیا۔ مزید تفتیش مکمل ہونے کے بعد چاروں افراد کو ہولڈنگ کیمپ منتقل کیا جائے گا۔
پولیس حکام کے مطابق غیر قانونی رہائش پذیر افراد کے خلاف کارروائیاں جاری رہیں گی اور سکیورٹی کو یقینی بنانے کے لیے حساس اداروں کے ساتھ قریبی رابطے میں رہتے ہوئے مؤثر اقدامات کیے جا رہے ہیں۔
