لندن: ’’المصطفیٰ ویلفیئر ٹرسٹ “ کے چیئرمین عبدالرزاق ساجد نے کہا ہے کہ ہم اپنی تنظیم کے پلیٹ فارم سے پاکستان ، آزاد کشمیر سمیت دُنیا کے 22ممالک میں انسانی فلاح وبہبود کا کام کر رہے ہیں۔
وہ المصطفیٰ امریکہ کے زیر اہتمام واشنگٹن میں فنڈ ریزنگ تقریب سے خطاب کر رہے تھے جس کی صدارت المصطفیٰ کے چیئرمین عبدالرزاق ساجد نے کی جبکہ مہمان خصوصی سید حیدر پاشا قادری الجیلانی تھے۔
اس موقع پر ڈائریکٹر المصطفیٰ امریکہ عثمان خان نوری ، معروف کاروباری شخصیت ماجد حسین ساہی اور جاوید کوثر نے بھی خطاب کیا جبکہ دلاور حسین اعوان، ڈاکٹر مسعود چوہدری، حافظ حبیب اللہ،منیر احمد، ڈاکٹر قدیر، ڈاکٹر انعام الحق،گل شیر ساہی، میاں اکرام نغمی، میاں الیاس، ٖضمیر عزیز، حافظ یوسف سمیت دیگر نے بھی تقریب میں شرکت کی۔
اس موقع پر ارویٰ فاطمہ، محمد مصعب، فروا فاطمہ نے چیریٹی کے بارے میں بریفنگ دی۔ چیئرمین عبدالرزاق ساجد نے اپنے خطاب میں کہا کہ المصطفیٰ رنگ ونسل ، مذہب اور فرقے کی تفریق سے بالا تر ہو کر دُکھی اور ضرورت مند انسانیت کی بے لوث خدمت کے لئے سرگرم عمل ہے، اس موثر و متحرک رفاہی ادارے کا خدمت خلق کا شاندار سفر ایک روشن تاریخ ہے جس کا ہرورق فلاح انسانیت کے کارناموں سے جگمگا رہا ہے۔
اُنہوں نے کہا المصطفیٰ ایک دعوت ہے محروم طبقات کی اور ایک تحریک ہے ،ضرورت مندوں کی ضرورتیں پوری کرنے کی ، انہوں نے کہاالمصطفیٰ ایک مشن ہے جس کا مقصد آنکھوں کے بجھتے چراغوں کو پھر سے روشن کرنا ہے یہ ایک جذبہ ہے بجھتی آنکھوں کی روشنی بحال کرنے کا اور اسی جذبے کے تحت المصطفیٰ اب تک آنکھوں کے دو لاکھ 25 ہزار فری آپریشن کر کے غریب افراد کو آنکھوں کی روشنی دے چکا ہے۔
اس موقع پر محمد عثمان نوری نے کہا کہ میں نےالمصطفیٰ کے ساتھ سفر شروع کرتے ہوئے کبھی سوچا نہیں تھا کہ ہماری ٹیم اتنا بڑا سفر بہت تھوڑے عرصہ میں کر لے گی کہ اب امریکہ سے لے کر 22ملکوں میںالمصطفیٰ کا نیٹ ورک کام کررہا ہے، اُنہوں نے کہاالمصطفیٰ کی آنکھوں کی روشنی بحال کرنے میں آپ لوگ ہمارا ساتھ دیں ۔
