جہلم: ڈپٹی کمشنر جہلم میثم عباس کی خصوصی ہدایت پر سیلاب سے متاثرہ علاقوں میں نکاسی آب کا عمل تیزی سے جاری ہے۔ ضلعی انتظامیہ بھاری مشینری کی مدد سے سیلابی پانی کے فوری اخراج کو یقینی بنا رہی ہے تاکہ متاثرہ شہریوں کو جلد از جلد اپنے گھروں تک رسائی حاصل ہو اور معمولات زندگی بحال کیے جا سکیں۔
ان خیالات کا اظہار ایڈیشنل ڈپٹی کمشنر ریونیو سنیہ صافی نے کیا۔ انہوں نے موضع خورد میں نکاسی آب کے جاری کام کا معائنہ کیا اور عملے کو ضروری ہدایات جاری کیں۔
اس موقع پر انہوں نے میڈیا سے گفتگو کرتے ہوئے کہا کہ ڈپٹی کمشنر جہلم میثم عباس کی خصوصی ہدایت پر تمام متاثرہ علاقوں میں نکاسی آب اور کیچڑ کے خاتمے کے لیے ضلعی انتظامیہ پوری طرح سرگرم ہے اور فیلڈ میں موجود ٹیمیں دن رات کام کر رہی ہیں۔
انہوں نے مزید کہا کہ ضلعی انتظامیہ متاثرہ علاقوں سے پانی کی جلد از جلد نکاسی کے ساتھ ساتھ صفائی اور دیگر بحالی کے اقدامات کو بھی یقینی بنا رہی ہے۔ ان کا کہنا تھا کہ ڈپٹی کمشنر جہلم خود امدادی اور بحالی کے کاموں کی نگرانی کر رہے ہیں تاکہ متاثرہ شہریوں کو فوری ریلیف ملے اور وہ جلد معمول کی زندگی کی طرف لوٹ سکیں۔
ایڈیشنل ڈپٹی کمشنر نے یقین دہانی کرائی کہ جب تک تمام متاثرہ علاقوں میں مکمل بحالی نہیں ہو جاتی، ضلعی انتظامیہ متحرک اور فیلڈ میں موجود رہے گی تاکہ عوام کو کسی قسم کی دشواری کا سامنا نہ کرنا پڑے۔
