جہلم کے ایک نجی میرج ہال میں ریٹائرڈ پولیس افسران کے اعزاز میں شاندار میٹنگ اور ظہرانے کا اہتمام کیا گیا۔ اس تقریب میں مہمان خصوصی کے طور پر سابق ایس پی چوہدری محمد افضل ورک نے شرکت کی۔
تقریب کا آغاز تلاوتِ کلام پاک، نعت رسول مقبول ﷺ اور صوفی شاعر میاں محمد بخش کے عارفانہ کلام سے ہوا۔
اس پروقار تقریب کے اسٹیج سیکرٹری کے فرائض سابق سب انسپکٹر پی آر او چوہدری الفت حسین اور سب انسپکٹر ریڈر ڈی پی او حاجی عبدالغفور بٹ نے سرانجام دیے جبکہ میزبانی کے فرائض سابق ڈی ایس پی جواد انور خان، سابق انسپکٹر چوہدری محمد الیاس، چوہدری صغیر احمد گجر، راجہ لہراسب خان، ملک محمد اقبال سروبہ، ملک خالد محمود، راجہ کوثر علی خان اور ملک نوشیروان خان نے ادا کیے۔
مہمانوں کے پنڈال میں پہنچنے پر شاندار استقبال کیا گیا اور پھولوں کی پتیاں نچھاور کی جاتی رہیں۔ اس موقع پر ضلع جہلم سمیت راولپنڈی، چکوال، منڈی بہاؤالدین، سرگودھا، گوجرانوالہ، گجرات، خوشاب اور پنجاب کے دیگر اضلاع سے تعلق رکھنے والے ریٹائرڈ افسران و ملازمین نے بڑی تعداد میں شرکت کی۔
مہمان خصوصی ایس پی محمد افضل ورک نے خطاب کرتے ہوئے کہا کہ یہ کاوش لائقِ تحسین ہے۔ برسوں بعد پرانے دوستوں کو ایک ساتھ دیکھ کر دل خوشی سے بھر گیا ہے۔ ایسے اجتماعات نہ صرف ملاقات کا خوبصورت ذریعہ ہیں بلکہ گزرے وقت کی حسین یادوں کو تازہ کرنے کا بھی موقع فراہم کرتے ہیں۔
منتظمین کو شرکاء نے بہترین انتظامات اور پرتکلف ظہرانے پر مبارکباد پیش کی۔
