جہلم: ضلع بھر میں 14 اگست یومِ آزادی منانے کی تیاریاں جوش و خروش سے جاری ہیں۔
گلیاں، بازار اور عمارتیں قومی پرچموں اور جھنڈیوں سے سج گئی ہیں۔ یومِ آزادی کے سلسلے میں شہروں، قصبوں اور دیہات میں جگہ جگہ قومی پرچم، بیجز، جھنڈیاں اور دیگر قومی اشیا کے اسٹال لگ چکے ہیں، جہاں شہری بڑی تعداد میں خریداری میں مصروف ہیں۔
سرکاری و نجی عمارتوں کو سبز و سفید روشنیوں سے سجا دیا گیا ہے جبکہ گلی کوچوں میں رنگ برنگی جھنڈیاں اور قومی پرچم لہرا رہے ہیں۔ شہریوں نے گھروں، دکانوں اور دفاتر کو برقی قمقموں، خوبصورت لائٹس اور جھنڈیوں سے آراستہ کر کے جشنِ آزادی کی تیاریوں کو نیا رنگ دے دیا ہے۔
سرکاری سطح پر بھی یومِ آزادی کی تقریبات کے لیے تیاریاں جاری ہیں۔ شہر کے سول لائن روڈ، ضلع کچہری روڈ، اولڈ جی ٹی روڈ، مین بازار، دلہن بازار، نیا بازار اور دیگر عوامی تفریحی مقامات پر 14 اگست کی جھلک نمایاں ہے۔
شہریوں کا کہنا ہے کہ یومِ آزادی محض ایک دن نہیں بلکہ قومی وحدت، قربانیوں کی یاد اور ملک سے محبت کا دن ہے، جسے ہر سال پورے جوش و جذبے سے منانا ہمارا فخر ہے۔
