جہلم: یونائیٹڈ الائنس گروپ کے امیدوار، چیئرمین انکریڈیبل جہلم چیمبر اور سابق ایگزیکٹو ممبر سرفراز ملک نے کہا ہے کہ جہلم چیمبر آف کامرس کو کاروباری برادری کی حقیقی آواز بنانے کے لیے مؤثر کردار ادا کیا جائے گا جبکہ تاجروں کو درپیش ٹیکس، رجسٹریشن اور دیگر مسائل کے فوری حل کے لیے عملی اقدامات ضروری ہیں۔
انہوں نے کہا کہ منتخب ہونے کی صورت میں کاروباری برادری کے لیے فیسلیٹیشن ڈیسک، بین الاقوامی بزنس ٹورز اور نئے کاروباری مواقع کے فروغ پر خصوصی توجہ دی جائے گی، تاکہ مقامی تاجروں اور صنعتکاروں کو کاروبار کو وسعت دینے کے لیے بہتر مواقع میسر آسکیں۔
سرفراز ملک نے بتایا کہ وہ پہلے ہی ویلز چیمبر آف کامرس (برطانیہ) اور راس الخیمہ چیمبر آف کامرس (متحدہ عرب امارات) کے ساتھ مفاہمتی یادداشتوں (ایم او یوز) کے سلسلے میں کردار ادا کرچکے ہیں، جس سے جہلم کی کاروباری برادری کے لیے بین الاقوامی روابط اور نئے مواقع پیدا کرنے میں مدد مل سکتی ہے۔
انہوں نے کہا کہ وہ گزشتہ تقریباً ایک دہائی سے جہلم چیمبر آف کامرس سے وابستہ ہیں اور مختلف عہدوں پر خدمات انجام دے چکے ہیں۔ اس کے علاوہ گزشتہ 26 سال سے ایس ایل ایس کالج کے ذریعے جہلم میں تعلیمی و کاروباری شعبوں میں بھی خدمات سرانجام دے رہے ہیں۔
سرفراز ملک نے اس عزم کا اظہار کیا کہ کاروباری برادری کے اعتماد پر پورا اترتے ہوئے چیمبر کو مزید فعال، مؤثر اور تاجروں کے مسائل کے حل کا مضبوط پلیٹ فارم بنایا جائے گا۔
