جہلم اور لاہور میں رمضان المبارک 1445 ہجری کا چاند نظر آگیا ہے، رویت ہلال کمیٹی نے رمضان المبارک کے چاند کا اعلان کردیا، کل پہلا روزہ ہوگا.
چاند کی پیدائش پاکستانی وقت کے مطابق اتوار کو دن 2 بجے ہوچکی تھی اور چاند کی عمر 22 گھنٹے تھی، جس کے پیش نظر چاند دکھائی دینے کے قوی امکانات تھے۔
پشاور میں چاند دیکھنے کیلئے رویت پہلال کمیٹی کا اجلاس ہوا، اجلاس کی صدارت ہلال کیمٹی کے چیئرمین مولاناعبدالخبیر آزاد نے کی جبکہ کمیٹی ممبران ڈاکٹر محمد حسین اکبر، سید مشاہد حسین، ڈائریکٹر جنرل مذہبی اموراشرف علی اور مفتی فیصل احمد بھی اجلاس میں شریک تھے۔
اس کے علاوہ اجلاس میں مفتی محمد یوسف کشمیری، مولانا عبد الرؤف مدنی، مفتی علی اصغر عطاری، مولانا محمد یسین ظفر، علامہ پیر سید شاہد علی جیلانی ، مولانا حافظ عبدلغفور، مفتی قاری مہراللہ اور سپارکو نمائندہ غلام مرتضیٰ بھی شریک تھے۔
مرکزی رویت ہلال کمیٹی کا اجلاس چارسدہ روڈ پر اوقاف ہال میں ہوا، اس کے علاوہ دیگر زونل و ضلعی رویت ہلال کمیٹیوں کے اجلاس اپنے اپنے مقامات پر بیک وقت منعقد کیے گئے۔
چیئرمین رویت ہلال کمیٹی نے مرکزی اجلاس کے بعد میڈیا سے گفتگو میں رمضان المبارک کے آغاز کا اعلان کیا اور بتایا کہ ملک کے مختلف علاقوں سے چاند نظر آنے کی شہادتیں موصول ہوئیں۔
دوسری جانب پشاور میں مفتی شہاب الدین کی صدارت میں غیرسرکاری رویت ہلال کمیٹی کا اجلاس بھی آج طلب کیا گیا ہے جو مسجد قاسم علی خان میں منعقد ہوا۔
مولانا سید محمد عبدالخبیر آزاد نے اپنے پیغام میں کہا کہ اللہ تعالیٰ سے دعا ہے کہ ہمارے ملک کو اس دفعہ بھی ایک ہی دن روزہ عطاء فرمائے۔
ماہرین کے مطابق کھلی آنکھ سے چاند دیکھنے کیلئے اس کی کم از کم عمر 26 گھنٹے اور افقی زاویہ 8 سے 10 اعشاریہ 5 ڈگری ہونا چاہیے، چاند کا سرکل مکمل ہونے کیلئے 29 دن اور کچھ گھنٹوں کا عمل دخل ہوتا ہے، انہی اضافی گھنٹوں کے باعث چاند کبھی 29 اور کبھی 30 دن کا ہوتا ہے۔
