سوہاوہ: یونین کونسل ججیال کے گاؤں مدن میں ٹیلنٹ پروموٹنگ لیگ سیزن ون کا فائنل شاندار طریقے سے منعقد ہوا، جس میں ہمبوہیل الیون نے سنسنی خیز مقابلے کے بعد سرفراز چھوٹو کی ٹیم کو شکست دے کر چیمپئن شپ کا ٹائٹل اپنے نام کرلیا۔
لیگ میں علاقہ بھر سے ٹیموں نے شرکت کی اور نوجوان کھلاڑیوں نے بھرپور صلاحیتوں کا مظاہرہ کیا۔ فائنل میچ میں سنسنی خیز لمحے دیکھنے کو ملے اور شائقین کرکٹ نے خوب لطف اٹھایا۔
تقریب میں مختلف شعبہ ہائے زندگی سے تعلق رکھنے والی ممتاز شخصیات نے بطور مہمانِ خصوصی شرکت کی، جن میں ملک اشفاق (سابق چیئرمین یوسی ججیال)، ملک ضمیر حسین (ڈپٹی ڈائریکٹر لوکل گورنمنٹ مری)، ملک آصف (چیف آرگنائزر گیسٹ ہاؤسز اسلام آباد)، ملک شاہد عارف (سینئر چیئرمین گیسٹ ہاؤسز اسلام آباد)، ملک عرفان (وائس چیئرمین گیسٹ ہاؤسز اسلام آباد)، بلال ملک (نائب صدر گیسٹ ہاؤسز اسلام آباد)، چوہدری سفیر، چوہدری نعیم لیاقت (ججیال)، مرزا عدنان (سیری گھنیال)، چوہدری عابد (گھنومیرا)، ٹھیکیدار محمد الیاس (نکہ چوہدریاں)، میاں مبشر (دینہ)، اور ایڈووکیٹ نوازش علی شامل تھے۔
مہمانوں کی آمد پر گراؤنڈ میں شاندار استقبال کیا گیا۔ پھولوں کے ہار پہنائے گئے، نوٹ اور پھول نچھاور کیے گئے جبکہ شائقین کی بڑی تعداد نے گراؤنڈ میں موجود رہ کر میچ کو چار چاند لگا دیے۔
انتظامیہ کی جانب سے شدید گرمی کے باوجود بہترین انتظامات کیے گئے۔ فائنل کے بعد کامیاب ٹیموں میں مہمان خصوصی نے انعامات تقسیم کیے اور کھلاڑیوں کو مبارکباد دی۔ انتظامیہ نے تمام مہمانوں اور شائقین کا تہہ دل سے شکریہ ادا کرتے ہوئے آئندہ بھی اس طرح کی سرگرمیوں کے انعقاد کے عزم کا اظہار کیا۔
یہ ایونٹ نہ صرف نوجوانوں کے لیے ایک مثبت تفریحی موقع ثابت ہوا بلکہ علاقائی ٹیلنٹ کو اجاگر کرنے میں بھی اہم کردار ادا کیا۔
