جہلم میں موسم سرد ہونے کے ساتھ ہی اندرونِ شہر کی مچھلی منڈیوں میں فروخت میں اضافہ دیکھنے میں آیا ہے، جس کے باعث منڈیوں میں مچھلی کے خریداروں کا رش بڑھ گیا ہے۔
خریداروں نے شکایت کی ہے کہ گزشتہ سال کے مقابلے میں مچھلی کی قیمتیں دگنی کر دی گئی ہیں، جس کی وجہ سے غریب، سفید پوش اور مزدور دیہاڑی دار طبقے کے لیے مچھلی کھانا عام شہریوں کے لیے مشکل ہو گیا ہے، جبکہ مہنگائی نے غریب کی قوتِ خرید مزید کم کر دی ہے۔
دوسری جانب مچھلی فروشوں کا کہنا ہے کہ گزشتہ برس سیلاب آنے کی وجہ سے فش فارمنگ کو نقصان پہنچا ہے اور پیداواری لاگت میں اضافہ ہونے کی وجہ سے قیمتوں میں اضافہ ناگزیر تھا۔ مارکیٹ میں رہو مچھلی 450 روپے فی کلو، سول مچھلی 2 ہزار روپے فی کلو، جبکہ سنگھاڑہ مچھلی 1 ہزار چار سو روپے میں فروخت ہو رہی ہے۔
شہریوں نے حکومتی اداروں سے مطالبہ کیا ہے کہ منہ زور مہنگائی پر کنٹرول کیا جائے اور پرائس کنٹرول مجسٹریٹس کو گران فروشوں کے خلاف بلا تفریق کارروائیاں کرنے کا پابند بنایا جائے، تاکہ لوگوں کو سرکاری نرخوں کے مطابق اشیاء ضروریہ دستیاب ہوں۔
