جہلم شہر کی منڈیوں میں جاری کردہ سرکاری نرخ کے برعکس فروٹ و سبزی فروش 50 سے 60 روپے زیادہ وصول کرنے میں مصروف، کوئی پوچھنے والا نہیں، پر ائس کنٹرول مجسٹریٹس اعلیٰ افسران کو سب اچھا ہے کی رپورٹس دینے میں مصروف ،پر ائس کنٹرول مجسٹریٹس خود بازاروں میں نکلنے کی بجائے اپنے کارندوں کو جر مانوں کے لئے کا پیاں دے کر بھجوادیتے ہیں۔
تفصیلات کے مطابق شہر سمیت مضافاتی علاقوں اور سبز ی منڈی میں کھلے عام سرکاری نرخ ناموں کے برعکس سبزی و پھل فروخت کئے جارہے ہیں ۔جنہیں کوئی پوچھنے والا نہیں۔
پرائس کنٹرول مجسٹریٹس سرکاری نرخ ناموں اور ریٹ لسٹیں آویزاں کروانے میں مکمل طور پر ناکام ہیں، دفتروں میں بیٹھ کر افسران میٹنگ میں کاغذی کارروائیاں کر کے سب اچھا ہے کی رپورٹس دے رہے ہیں، غریب عوام کا اس خود ساختہ مہنگائی نے کچومر نکال کر رکھ دیا ہے۔
سبزیوں کی قیمتوں کو پر لگ گئے ، مہنگائی سے شہری پریشان ہیں جبکہ شہرمیں غیر معیاری دودھ اور دہی کی فروخت بھی جاری ہے اور یہ دودھ اور دہی سرکاری نرخ سے 50 روپے سے زائد میں فروخت ہو رہا ہے جن کو کوئی پوچھنے والا نہیں، پرائس کنٹرول مجسٹریٹس دکانداروں کو چیک کرنے کی زحمت گوارہ نہیں کرتے بلکہ اپنے کارندوں کو جرمانے کرنے کی کاپیاں دیکر اپنے ٹارگٹ پورے کرلیتے ہیں۔
اس طرح ریڑھی بانوں کو جرمانے کردیئے جاتے ہیں جبکہ دکاندار من مرضی کے نرخوں پر سبزیاں ، پھل ، دودھ ،دہی سمیت اشیاء ضروریہ فروخت کرکے صارفین کی جیبوں کو خالی کرنے میں مصروف ہیں۔
شہریوں نے ارباب اختیار سے نوٹس لینے کا مطالبہ کیا ہے۔
