جہلم:چیئرمین بورڈ آف انٹرمیڈیٹ اینڈ سیکنڈری ایجوکیشن راولپنڈی محمد عدنان خان اور کنٹرولر امتحانات تنویر اصغر اعوان نے انٹرمیڈیٹ فرسٹ اینول امتحانات 2025 کے دوران مختلف امتحانی مراکز کا اچانک دورہ کیا۔ دوران معائنہ 9 امیدواروں کو نقل کرتے ہوئے رنگے ہاتھوں گرفتار کر لیا گیا، جن کے خلاف فوری طور پر کیسز رجسٹر کر کے ڈسپلن برانچ کو بھجوا دیا گیا۔
چیئرمین تعلیمی بورڈ محمد عدنان خان نے امتحانی مراکز کے دورے کے موقع پر زیرو ٹالرینس پالیسی پر سختی سے عملدرآمد کی ہدایت جاری کرتے ہوئے واضح کیا کہ امتحانات میں شفافیت ہر صورت یقینی بنائی جائے گی۔ انہوں نے کہا کہ بدعنوانی، نقل اور بوٹی مافیا کے مکمل خاتمے کے لیے بلا امتیاز کارروائیاں جاری رہیں گی۔ قواعد و ضوابط کی خلاف ورزی کرنے والے امتحانی عملے کے خلاف فوری اور سخت ایکشن لیا جائے گا۔
دوسری جانب کنٹرولر امتحانات تنویر اصغر اعوان نے گورنمنٹ گرلز ہائر سیکنڈری اسکول دینہ، گورنمنٹ بوائز ہائر سیکنڈری اسکول دینہ، اور گورنمنٹ گریجویٹ کالج فار ویمن جہلم کے امتحانی مراکز (سینٹر A اور B) کا معائنہ کیا۔
دورے کے بعد میڈیا سے گفتگو کرتے ہوئے انہوں نے بتایا کہ امتحان کے دوران نو طلبہ، جن میں رولنمبر716311امتحانی مرکزگورنمنٹ ہشمت علی اسلامیہ ایسو سی ایٹ کالج ڈھوک کشمیریاں راولپنڈی، رولنمبر716312امتحانی مرکزگورنمنٹ ہشمت علی اسلامیہ ایسو سی ایٹ کالج ڈھوک کشمیریاں راولپنڈی،رولنمبر707248گورنمنٹ گرلز ہائیر سیکنڈری سکول دینہ جہلم،رولنمبر707291گورنمنٹ گرلز ہائیر سیکنڈری سکول دینہ جہلم،رولنمبر707293گورنمنٹ گرلز ہائیر سیکنڈری سکول دینہ جہلم رول نمبر 701945 گورنمنٹ ایسوسییٹ کالج فار وومن جہلم سینٹر بی رول نمبر 740196 اور 740227 گورنمنٹ ایم سی سلامیہ ہائر سکینڈری سکول جہلم شامل تھے، نقل کرتے ہوئے رنگے ہاتھوں پکڑے گئے جن کے خلاف فوری طور پر کیسز رجسٹر ڈکر کے ڈسپلن برانچ کو بھجوا دیے گئے ہیں۔
کنٹرولر امتحانات نے مزید بتایا کہ میٹرک فرسٹ اینول 2025 کے سلسلے میں قائم پریکٹیکل لیبارٹریز کا بھی معائنہ کیا گیا۔ اس دوران گرلز ہائر سیکنڈری اسکول دینہ میں تعینات پریکٹیکل ایگزامینر محمود احمد SST کو پریکٹیکل SOPs کی سنگین خلاف ورزی پر فوری طور پر ڈیوٹی سے فارغ کر دیا گیا، اور ان کی جگہ نیا ایگزامینر تعینات کر دیا گیا ہے۔
تعلیمی بورڈ حکام کا کہنا ہے کہ امتحانی نظام کو شفاف اور بدعنوانی سے پاک بنانے کے لیے سخت اقدامات کا سلسلہ جاری رہے گا اور کسی کو بھی قواعد کی خلاف ورزی کی اجازت نہیں دی جائے گی۔
