جہلم: ڈپٹی کمشنر جہلم میثم عباس کی ہدایت پر سول ڈیفنس کی خصوصی ٹیم نے محمدی چوک میں ایک کامیاب کارروائی کے دوران اسمگل شدہ ڈیزل فروخت کرنے والی گاڑی پکڑ لی۔
اس کارروائی کی سربراہی سول ڈیفنس آفیسر چوہدری اشفاق احمد گجر نے کی، جس کے نتیجے میں دو ملزمان کو گرفتار کر کے پولیس کے حوالے کر دیا گیا۔ پولیس نے ملزمان کے خلاف قانونی کارروائی کرتے ہوئے مقدمہ درج کر لیا ہے۔
سول ڈیفنس آفیسر چوہدری اشفاق احمد گجر نے اس موقع پر گفتگو کرتے ہوئے کہا کہ پٹرولیم مصنوعات کی اسمگلنگ قومی معیشت کو نقصان پہنچانے کے مترادف ہے اور اس کے خلاف سخت کارروائیاں جاری رکھی جائیں گی۔
انہوں نے کہا کہ ضلع بھر میں غیر قانونی کاروبار کرنے والوں کے خلاف کارروائیاں تیز کر دی گئی ہیں تاکہ اسمگل شدہ مصنوعات کی فروخت کا مکمل سدباب کیا جا سکے۔
ضلعی انتظامیہ کے ترجمان نے بھی واضح کیا کہ ایسے غیر قانونی کاروبار میں ملوث افراد کے خلاف زیرو ٹالرنس پالیسی اپنائی جا رہی ہے۔ ان کا کہنا تھا کہ قانون کی خلاف ورزی کرنے والوں کو کسی بھی صورت معاف نہیں کیا جائے گا اور انہیں سخت سے سخت سزائیں دی جائیں گی۔
