جہلم: اسٹیٹ بینک آف پاکستان کے زیرِ اہتمام ڈیجیٹل پیمنٹس کے عنوان سے ایک اہم آگاہی سیمینار ضلع کونسل ہال، ضلع کچہری جہلم میں منعقد ہوا۔
سیمینار میں اسٹیٹ بینک کے اعلیٰ افسران، مختلف بینکوں کے مینیجرز، مالیاتی اداروں کے نمائندگان، میڈیا نمائندگان اور جہلم پریس کلب کے اراکین نے شرکت کی۔
سیمینار سے خطاب کرتے ہوئے مقررین نے ڈیجیٹل پیمنٹس (ڈیجیٹل بینکاری)کی اہمیت اور افادیت پر تفصیلی روشنی ڈالی۔ ان کا کہنا تھا کہ جدید دور کے تقاضوں کو مدنظر رکھتے ہوئے اسٹیٹ بینک آف پاکستان چند سیکنڈز میں ٹرانزیکشنز، یوٹیلیٹی بلز اور دیگر مالی معلومات کی فراہمی میں مؤثر کردار ادا کر رہا ہے۔ عوام الناس کو ڈیجیٹل بینکنگ نظام سے آگاہ کرنا اور اس کے فوائد سے روشناس کرانا متعلقہ اداروں کی اہم ذمہ داری ہے۔
مقررین نے مزید کہا کہ ڈیجیٹل پیمنٹس کے فروغ سے نہ صرف شفافیت میں اضافہ ہوگا بلکہ کرنسی مافیا کی حوصلہ شکنی بھی ممکن ہو سکے گی۔ اس عمل سے بینک صارفین کو محفوظ، تیز اور آسان مالی سہولیات میسر آئیں گی، جس کے نتیجے میں کاروباری سرگرمیوں کو فروغ ملے گا اور ملکی معیشت مضبوط ہو گی۔
آخر میں شرکاء نے اس بات پر زور دیا کہ ڈیجیٹل بینکنگ اور کیش لیس ٹرانزیکشنز کو عام کرنے کے لیے مزید آگاہی پروگرامز اور سیمینارز کا انعقاد وقت کی اہم ضرورت ہے تاکہ زیادہ سے زیادہ افراد جدید مالی نظام سے فائدہ اٹھا سکیں۔
