پنڈدادنخان: وزیر مواصلات پنجاب صہیب بھرتھ نے 20 ارب روپے کی لاگت سے زیرِ تعمیر للِہ تا جہلم ڈیول کیرج وے منصوبے کا دورہ کیا اور جاری کام کی رفتار اور پیش رفت کا تفصیلی جائزہ لیا۔
اس موقع پر میڈیا سے گفتگو کرتے ہوئے صوبائی وزیر نے کہا کہ سابقہ حکومت نے عوام سے دھوکہ کرتے ہوئے اس اہم منصوبے کو ادھورا چھوڑ دیا تھا، جس کی وجہ سے مقامی آبادی کو شدید مشکلات کا سامنا کرنا پڑا۔ تاہم وزیر اعلیٰ پنجاب مریم نواز شریف کی خصوصی ہدایات پر اس منصوبے کو دوبارہ بحال کیا گیا اور اب تیزی سے تکمیل کی جانب گامزن ہے۔
انہوں نے کہا کہ پنجاب حکومت عوامی خدمت کے وژن کے تحت سڑکوں کی تعمیر پر بھرپور توجہ دے رہی ہے اور مریم نواز شریف کی قیادت میں تمام اہم شاہراہوں کی تعمیر مکمل کی جا رہی ہے تاکہ عوام کو بہتر سفری سہولیات میسر آ سکیں۔
وزیر مواصلات پنجاب نے مزید بتایا کہ اس منصوبے کے لیے وزیراعلیٰ مریم نواز نے 8 اعشاریہ 5 ارب روپے کے فنڈز جاری کیے ہیں اور سڑک کے چار سیکٹرز رواں سال کے دوران مکمل کرنے کے لیے تمام وسائل بروئے کار لائے جا رہے ہیں۔
ایک ماہ کے اندر ریکارڈ رفتار سے کام جاری ہے، اور اس منصوبے کو جلد از جلد مکمل کرنے کے لیے ہر ممکن اقدامات کیے جا رہے ہیں۔
صہیب بھرتھ نے اس بات پر زور دیا کہ وزیر اعلیٰ مریم نواز نہ صرف اس منصوبے کی خود نگرانی کر رہی ہیں بلکہ اسے صوبائی کابینہ سے بھی منظور کرایا گیا ہے، تاکہ عوام کو جلد از جلد اس منصوبے کے ثمرات مل سکیں۔
