مانچسٹر: پاکستان معاشی اور سیاسی بحران سے اسی وقت نکل سکتا ہے جب عوام کی منتخب حکومت کو اقتدار سونپا جائے گا، موجودہ حالات اس امر کے متقاضی ہیں کہ غیر جانبدار موجودہ حکومت صاف و شفاف انتخابات کا انعقاد کرنے کے لئے اپنے تمام تر وسائل بروئے کار لائے۔
ان خیالات کا اظہار اوورسیز کوارڈنیٹر مسلم لیگ (ن) اور اے پی ایل برطانیہ کے صدر بیرسٹر امجد ملک نے گفتگو کرتے ہوئے کیا۔ انہو ں نے کہا کہ پی ٹی آئی کی حکومت کے دوران اس قد رقرضے بھاری سود پر لئے گئے کہ اب انہیں واپس کرنا آنے والی کسی بھی حکومت کیلئے ایک چیلنج ہوگا، ہم سیاست کی نہیں بلکہ معاشی صورتحال میں بہتری کے لئے مسلم لیگ ن کو نجات دہندہ تصور کرتے ہیں۔
انہوں نے کہا کہ میاں نواز شریف کے ادوار میں پاکستان نے بے مثال ترقی کی اور ایٹمی طاقت بنا مگر آج ایک مستحق حکومت نہ ہونے کی وجہ سے پورا عالم اسلام احساس محرومی، خوف و دہشت کا شکار ہے، پاکستان اسلام کا قلعہ ہے۔
امجد ملک نے کہا کہ میاں نواز شریف پاکستان کا کھویا ہوا مقام واپس دلانے کی بھر پور صلاحیت رکھتے ہیں تو دوسری طرف وہ آئی ایم ایف سے چھٹکارا دلانے کا عزم کر چکے ہیں، پاکستان کو اپنے زیر نگیں رکھنے کے لئے عالمی طاغوتی طاقتیں انتخابات کے التواء کا رونا رو رہی ہیں جبکہ بروقت انتخابات سے ہی موجودہ حالات سے نکلا جا سکتا ہے۔
انہوں نے کہا کہ پاکستان میں انصاف عوام کو دہلیز پر پہنچا کر ہی ترقی کے راستوں کا تعین کیا جا سکتا ہے، جب انصاف کا بول بالا ہوگا تو دنیا بھر میں ایک کروڑ سے زائد تارکین وطن قانونی طریقوں سے پاکستان زر مبادلہ بھیج کر اس کی معیشت کو سہارا دے سکتے ہیں، تارکین وطن ہمیشہ اپنی روزی روٹی کیلئے اتنا فکر مند نہیں رہتے، جتنا وہ پاکستان کے حالات سے متاثر ہوتے ہیں۔
