جہلم: متعلقہ اداروں کی مبینہ عدم توجہی کے باعث جہلم شہر سمیت ضلع بھر میں بھٹہ خشت مالکان کی جانب سے اینٹوں کے نرخوں میں مسلسل اضافے نے غریب اور محنت کش طبقے کے لیے گھر تعمیر کرنا انتہائی مشکل بنا دیا ہے، جبکہ سفید پوش طبقے کے لیے اپنا گھر بنانا ایک ڈراؤنا خواب بن کر رہ گیا ہے۔
تفصیلات کے مطابق جہلم شہر سمیت ضلع کی چاروں تحصیلوں میں اینٹوں کی قیمتوں میں مسلسل اضافے کے باعث تعمیراتی اخراجات میں نمایاں اضافہ ہوگیا ہے۔ مہنگائی کے ہاتھوں پہلے ہی پریشان غریب اور محنت کش طبقہ مکان کی تعمیر کے اخراجات برداشت کرنے سے قاصر دکھائی دیتا ہے۔
شہریوں کا کہنا ہے کہ اینٹوں کے نرخوں میں مسلسل اضافے کے باعث محدود آمدنی رکھنے والے افراد کے لیے اپنے خاندان کے لیے چھت تعمیر کرنا بھی مشکل ہوگیا ہے، جبکہ متعلقہ اداروں کی جانب سے قیمتوں کی نگرانی اور سرکاری نرخوں پر عملدرآمد یقینی بنانے کے لیے موثر اقدامات نظر نہیں آرہے۔
شہریوں نے کمشنر راولپنڈی اور ڈپٹی کمشنر جہلم سے مطالبہ کیا ہے کہ اینٹوں کی قیمتوں میں اضافے کا فوری نوٹس لیا جائے، بھٹہ خشت مالکان کو سرکاری نرخوں کا پابند بنایا جائے اور خلاف ورزی کرنے والوں کے خلاف قانون کے مطابق کارروائی عمل میں لائی جائے۔
