جہلم: آئندہ موسم برسات اور ممکنہ سیلابی صورتحال سے نمٹنے کیلئے تمام تیاریاں بروقت مکمل کی جائیں جبکہ موک ایکسرسائز کا بھی اہتمام کیا جائے۔
ڈپٹی کمشنر جہلم سیدہ رملہ علی نے یہ بات پری فلڈ میٹنگ سے خطاب کرتے ہوئے کہی۔ میٹنگ میں ریسکیو 1122 کے ڈی او نے گزشتہ سالوں میں سیلابی صورتحال اور آئندہ موسم برسات میں ممکنہ سیلابی صورتحال سے بچاؤ کے لیے اقدامات، وسائل اور تیاریوں پر تفصیلی بریفنگ دی۔
ڈپٹی کمشنر جہلم کی سربراہی میں ڈسٹرکٹ ڈیزاسٹر مینجمنٹ اتھارٹی اور ڈسٹرکٹ ایمرجنسی بورڈ کی میٹنگ میں ممکنہ سیلاب کے پیش نظر تمام اقدامات کا جائزہ لیا گیا، ڈی سی جہلم نے تمام متعلقہ اداروں کو مشترکہ لائحہ عمل بنا کر فوری عمل درآمد کی ہدایت کی۔
ڈپٹی کمشنر جہلم نے کہا کہ مشکل حالات میں لوگوں کی مدد کرنا آسان کام نہیں ہے اور تمام متعلقہ ادارے سیلابی صورتحال میں لوگوں کو بہترین انداز میں اپنی سروسز فراہم کریں۔
میٹنگ میں ایڈیشنل ڈپٹی کمشنر ریونیو محمد حسان طارق، اسسٹنٹ کمشنر جہلم محمد مبین احسن، اسٹنٹ کمشنر دینہ سعدیہ ڈوگر، چیف میونسپل آفیسر جہلم، ڈسٹرکٹ ڈزاسٹر مینجمنٹ کوآرڈینٹیر محمد صبورثاقب، اسسٹنٹ ڈائریکٹر لائیو سٹاک، اسسٹنٹ ڈائریکٹر لوکل گورنمنٹ، ڈپٹی ڈائریکٹر سوشل ویلفیئر، سب ڈویژنل آفیسر سمال ڈیمز، توصیف بیگ (حمزہ بیگ ویلفیئر سوسائٹی) اور دیگر محکمہ جات کے نمائندوں نے شرکت کی۔
انجینئر سعید احمد ڈسٹرکٹ ایمرجنسی آفیسر ریسکیو 1122 نے سیلابی صورتحال میں پیدا ہونے والے حالات پر بریفنگ دی۔جس میں سیلابی صورتحال میں لوگوں کو ریسکیو کرنے کے حوالے سے موجود وسائل، فلڈ سیکٹرز کی تشکیل، ریسکیوز کی سیلاب زدہ علاقوں میں تعیناتی، ہنگامی حالات میں لوگوں کو انخلا،ڈوبتے ہوئے لوگوں کو بچانے اور ان کو فرسٹ ایڈ فراہم کرنے جیسے اقدامات کا بتایا گیا۔
