منگلا: پاک فوج میں اہم ترقیاں اور تبادلے کیے گئے ہیں، 3 سینئر افسران کی لیفٹیننٹ جنرل کے عہدے پر ترقی، لیفٹیننٹ جنرل نعمان ذکریا کو کور کمانڈر منگلا تعینات کر دیا گیا۔
پاک فوج نے ڈی جی آئی ایس پی آر میجر جنرل احمد شریف چوہدری، میجر جنرل عمر بخاری اور میجر جنرل عنایت حسین کو لیفٹیننٹ جنرل کے عہدے پر ترقی دے دی ہے۔
آئی ایس پی آر کی جانب سے ان ترقیوں کا باضابطہ اعلان ابھی باقی ہے تاہم ان کی خبر گزشتہ روز دو بڑے انگریزی اخبارات نے شائع کی۔
چیف آف لاجسٹک اسٹاف لیفٹیننٹ جنرل نعمان ذکریا کو کور کمانڈر منگلا بنا دیا گیا ہے۔ کور کمانڈر منگلا ایمن بلال صفدر نے حال ہی میں قبل از وقت ریٹائرمنٹ لے لی تھی۔
کور کمانڈر منگلا تعینات ہونے والے لیفٹیننٹ جنرل نعمان ذکریا اس سے پہلے چیف آف لاجسٹکس سٹاف، ڈی جی ملٹری آپریشنز اور کمانڈنگ آفیسر وزیرستان رہ چکے ہیں۔
قابل ذکر بات یہ ہے کہ نومبر 2025 کی سنیارٹی لسٹ میں وہ چیئرمین جوائنٹ چیفس آف سٹاف کمیٹی اور آرمی چیف کے عہدے کے لئے اہم نام ہوں گے۔ اگر موجودہ آرمی چیف جنرل عاصم منیر کو ایکسٹینشن دی جائے گی تب بھی جنرل نعمان ذکریا چیئرمین جوائنٹ چیفس آف سٹاف کمیٹی کے لئے تصور کئے جائیں گے۔
جنرل نعمان ذکریا کی جگہ نئے ترقی پانے والے افسر لیفٹیننٹ جنرل عنایت حسین کو تعینات کر دیا گیا، جنرل عنایت حسین وائس چیف آف جنرل اسٹاف (براوو) کے طور پر خدمات انجام دینے والے میجر جنرل تھے۔
میجر جنرل عمر بخاری کو لیفٹیننٹ جنرل کے عہدے پر ترقی دے کر پشاور میں قائم الیون کور کا کمانڈر مقرر کردیا گیا۔ ان سے قبل لیفٹیننٹ جنرل حسن اظہر حیات خان اس عہدے پر فرائض انجام دے رہے تھے۔ جنرل حسن اظہر حیات ریٹائرمنٹ کی عمر کو پہنچنے پر ریٹائڑ ہو رہے ہیں۔
پشاور میں نئے کمانڈر میجر جنرل عمر بخاری اس سے قبل جنرل ہیڈ کوارٹرز میں وائس چیف آف جنرل اسٹاف (الفا) کے طور پر خدمات انجام دے رہے تھے۔
ڈی جی آئی ایس پی آر میجر جنرل احمد شریف کو لیفٹیننٹ جنرل کے عہدے پر ترقی دے کر فی الحال آئی ایس پی آر میں برقرار رکھا گیا ہے۔
جنرل احمد شریف کا تعلق کور آف الیکٹریکل اینڈ مکینیکل انجینئرز سے ہے اور ای ایم ای کے بہت کم افسران تھری اسٹار رینک تک پہنچے ہیں۔
